ᠢᠳ᠋ᠡᠭᠡᠨ ᠤᠮᠳᠠᠭᠠᠨ（ᠮᠣᠩᠭᠤᠯ ᠦᠨᠳᠦᠰᠦᠲᠡᠨ）
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/9
        ᠤᠯᠠᠭᠠᠨ ᠢᠳ᠋ᠡᠭᠡᠨ  ᠤᠯᠠᠭᠠᠨ ᠢᠳ᠋ᠡᠭᠡᠨ ᠪᠣᠯ ᠮᠣᠩᠭᠣᠯ ᠦᠨᠳ᠋ᠦᠰᠦᠳ᠋ᠡᠨ  ᠤ ᠤᠯᠠᠮᠵᠢᠯᠠᠯᠳ᠋ᠣ ᠭᠣᠣᠯ ᠢᠳ᠋ᠡᠭᠡᠨ ᠪᠣᠯᠣᠨ᠎ᠠ᠃ ᠦᠭᠡᠷ ᠬᠣᠨᠢᠨ ᠮᠢᠬ᠎ᠠ ᠪᠠᠷ ᠭᠣᠣᠯᠯᠠᠳ᠋ᠠᠭ᠃ ᠦᠩᠭᠡᠷᠡᠭᠰᠡᠨ ᠳ᠋ᠤ ᠬᠤᠶᠢᠳᠦ ᠬᠡᠳᠦᠨ ᠬᠣᠰᠢᠭᠣ ᠰᠢᠶᠠᠨ  ᠤ ᠮᠣᠩᠭᠣᠯ ᠦᠨᠳ᠋ᠦᠰᠦᠳ᠋ᠡᠨ ᠭᠠᠬᠠᠢ ᠲᠡᠵᠢᠭᠡᠳ᠋ᠡᠭ ᠦᠭᠡᠢ᠂ ᠮᠣᠷᠢ᠂ ᠡᠯᠵᠢᠭᠡ᠂ ᠨᠣᠬᠠᠢ᠂ ᠵᠢᠭᠠᠰᠤ ᠶᠢᠨ ᠮᠢᠬ᠎ᠠ ᠢᠳ᠋ᠡᠳ᠋ᠡᠭ ᠦᠭᠡᠢ᠃ ᠮᠠᠯᠴᠢᠳ  ᠤᠨ ᠮᠠᠯ  ᠨᠢᠲᠤᠯᠬᠤ ᠨᠢ ᠤᠯᠠᠷᠢᠯ ᠤᠨ ᠴᠢᠨᠠᠷᠳᠠᠢ ᠶᠤᠮ᠃ ᠶᠡᠷᠤ ᠳᠤ ᠪᠠᠨ ᠪᠢᠯᠢᠭ ᠦᠨ ᠤᠯᠠᠷᠢᠯ  ᠦᠨ ᠲᠠᠪᠣᠳᠤᠭᠠᠷ ᠰᠠᠷ᠎ᠠ ᠶᠢᠨ ᠰᠡᠭᠦᠯᠴᠢ ᠪᠡᠷ ᠡᠪᠡᠰᠦ ᠪᠡᠯᠴᠢᠭᠡᠷ ᠥᠩᠭᠡ ᠰᠢᠮᠡᠯᠢᠭ ᠪᠣᠯᠵᠤ᠂ ᠦᠬᠡᠷ ᠬᠤᠨᠢ ᠲᠠᠷᠭᠤ ᠰᠠᠭᠤᠭᠰᠠᠨ ᠬᠤᠶᠢᠨ᠎ᠠ ᠡᠬᠢᠯᠡᠵᠤ  ᠨᠢᠲᠤᠯᠳᠠᠭ᠃ ᠭᠡᠪᠡᠴᠦ ᠶᠡᠭᠡ ᠬᠡᠮᠵᠢᠶ᠎ᠡ ᠪᠡᠷ ᠨᠢᠲᠤᠯᠬᠤ ᠪᠢᠰᠢ᠂ ᠢᠳᠡᠬᠦ ᠬᠡᠮᠵᠢᠶ᠎ᠡ ᠪᠡᠷ ᠢᠶᠡᠨ  ᠨᠢᠲᠤᠯᠵᠤ᠂ ᠡᠳᠦᠷ ᠳᠤᠲᠤᠮ ᠤᠨ ᠢᠳᠡᠬᠦ ᠮᠢᠬ᠎ᠠ ᠪᠠᠨ ᠪᠠᠳᠤᠯᠠᠪᠠᠯ ᠪᠣᠯᠴᠢᠬᠠᠨ᠎ᠠ᠃ ᠬᠡᠷᠪᠡ ᠦᠯᠡᠳᠡᠬᠦ ᠳᠦ ᠬᠦᠷᠪᠡᠯ ᠪᠣᠷᠴᠠᠯᠠᠨ ᠬᠠᠳᠠᠭᠠᠵᠤ ᠬᠠᠳᠠᠭᠠᠯᠠᠳᠠᠭ᠃ ᠡᠪᠦᠯ  ᠦᠨ ᠡᠬᠢ ᠪᠡᠷ ᠪᠠᠭ᠎ᠠ ᠴᠠᠰᠤ ᠶᠢᠨ ᠡᠮᠦᠨ᠎ᠡ ᠬᠤᠶᠢᠨ᠎ᠡ ᠠᠭᠤᠷ ᠠᠮᠢᠰᠬᠤᠯ ᠬᠦᠢᠳᠡᠷᠡᠨ ᠮᠢᠬ᠎ᠠ ᠶᠢ ᠬᠠᠳᠠᠭᠠᠯᠠᠵᠤ ᠲᠡᠶᠢᠯᠬᠦ ᠪᠣᠯᠵᠤ᠂ ᠦᠬᠡᠷ ᠬᠤᠨᠢ ᠶᠢᠨ ᠲᠠᠷᠭᠤ ᠪᠠᠭᠤᠷᠠᠬᠤ ᠠᠴᠠ ᠡᠮᠦᠨ᠎ᠡ᠂ ᠨᠢᠭᠡ ᠤᠳᠠᠭ᠎ᠠ ᠲᠦᠪᠯᠡᠷᠡᠭᠦᠯᠦᠨ  ᠨᠢᠲᠤᠯᠵᠤ᠂ ᠪᠦᠬᠦᠯᠢ ᠡᠪᠦᠯ ᠬᠠᠪᠣᠷ  ᠦᠨ ᠬᠤᠭᠤᠴᠠᠭᠠᠨ ᠤ ᠢᠳᠡᠰᠢᠨ ᠮᠢᠬ᠎ᠠ ᠪᠠᠨ ᠭᠦᠢᠴᠡᠳ  ᠨᠥᠭᠡᠴᠡᠯᠡᠨ ᠪᠡᠯᠡᠳᠬᠡᠳᠡᠭ᠃ ᠮᠠᠯᠴᠢᠳ ᠤᠨ ᠬᠤᠨᠢ ᠢᠮᠠᠭ᠎ᠠ  ᠨᠢᠲᠤᠯᠬᠤ ᠠᠷᠭ᠎ᠠ ᠨᠢ ᠲᠣᠯᠣᠭᠠᠢ  ᠢᠢ ᠨᠢ ᠤᠭᠲᠤᠯᠬᠤ ᠪᠢᠰᠢ᠂ ᠬᠠᠷᠢᠨ ᠦᠷᠦᠴᠡᠨ  ᠤ ᠬᠡᠰᠡᠭ ᠲᠦ ᠨᠢ ᠪᠠᠭ᠎ᠠ ᠬᠠᠭᠠᠯᠵᠣ᠂ ᠭᠠᠷ  ᠢᠢᠠᠨ ᠤᠷᠣᠭᠣᠯᠵᠣ ᠭᠣᠣᠯ  ᠤᠨ ᠰᠤᠳᠠᠯ ᠢ ᠨᠢ ᠳᠠᠰᠣᠯᠳ᠋ᠠᠭ᠂ ᠢᠩᠭᠢᠵᠤ ᠦᠷᠦᠴᠡᠯᠡᠵᠦ ᠠᠯᠠᠬᠤ ᠨᠢ ᠠᠷᠠᠰᠤ ᠮᠢᠬᠠᠨ ᠤ ᠪᠦᠳᠦᠨ ᠠᠷᠢᠭᠤᠨ ᠢ ᠪᠠᠳᠤᠯᠠᠵᠤ ᠴᠢᠳᠠᠳᠠᠭ᠃ ᠮᠢᠬᠠᠨ ᠢᠳ᠋ᠡᠭᠡᠨ ‍ᠢ ᠮᠣᠩᠭᠣᠯᠴᠣᠳ ᠤᠯᠠᠭᠠᠨ ᠢᠳ᠋ᠡᠭᠡᠨ ᠭᠡᠳ᠋ᠡᠭ᠃ ᠤᠯᠠᠭᠠᠨ ᠢᠳ᠋ᠡᠭᠡᠨ ‍ᠢ ᠭᠣᠣᠯᠳᠠᠭᠤ ᠬᠤᠨᠢᠨ ᠤᠭᠣᠴᠠ ᠭᠠᠷᠭᠠᠬᠤ᠂ ᠰᠢᠬᠦᠰᠤ ᠭᠠᠷᠭᠠᠬᠤ᠂ ᠰᠢᠷᠠᠬᠣ᠂ ᠴᠢᠨᠠᠬᠣ᠂ ᠬᠠᠭᠰᠠᠭᠠᠬᠤ᠂ ᠬᠠᠭᠤᠷᠤᠯᠭ᠎ᠠ ᠬᠢᠬᠦ᠂ ᠬᠠᠯᠠᠭᠣᠨ ᠳᠣᠭᠣᠭ᠎ᠠ ᠬᠢᠬᠦ ᠵᠡᠷᠭᠡ ᠤᠯᠠᠨ ᠵᠦᠢᠯ  ᠤᠨ ᠠᠷᠭ᠎ᠠ  ᠪᠠᠷ ᠢᠳᠡᠳᠡᠭ᠃ ᠪᠠᠶᠠᠷ ᠲᠤᠷᠠᠰᠬᠠᠯ  ᠦᠨ ᠡᠳ᠋ᠦᠷ ᠪᠣᠶᠣ ᠬᠦᠨᠳ᠋ᠦ ᠵᠣᠴᠢᠨ  ᠢᠢᠠᠨ ᠳᠠᠶᠢᠯᠠᠬᠣ ᠳ᠋ᠤ ᠪᠦᠬᠦᠯᠢ ᠬᠤᠨᠢᠨ ᠰᠢᠭᠦᠰᠦ ᠶᠢᠨ ᠲᠠᠶᠢᠯᠠᠯᠭ᠎ᠠ ᠭᠠᠷᠭᠠᠳ᠋ᠠᠭ᠃        ᠳᠠᠶᠢᠯᠠᠯᠭ᠎ᠠ ᠶᠢᠨ ᠰᠢᠷᠡᠭᠡᠨ ᠳᠦ ᠪᠦᠬᠦᠯᠢ ᠬᠤᠨᠢᠨ ᠰᠢᠭᠦᠰᠦ ᠣᠷᠣᠭᠤᠯᠬᠤ ᠶᠢ ᠮᠣᠩᠭᠣᠯᠴᠣᠳ︽ᠪᠦᠬᠦᠯᠢ ᠳᠠᠯᠪᠢᠬᠣ︾ ᠭᠡᠳᠡᠭ᠃ ᠡᠨᠡ ᠨᠢ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠲᠠᠬᠢᠬᠤ᠂ ᠤᠪᠣᠭ᠎ᠠ ᠳᠠᠬᠢᠬᠣ ᠪᠣᠯᠣᠨ ᠬᠦᠨᠳ᠋ᠦᠳ᠋ᠦ ᠵᠣᠴᠢᠨ  ᠢᠢᠠᠨ ᠵᠤᠴᠢᠯᠠᠬᠤ ᠳᠤ ᠤᠷᠤᠭᠤᠯᠳᠠᠭ ᠬᠠᠮᠣᠭ  ᠦᠨ ᠶᠡᠬᠡ ᠡᠷᠬᠢᠮ ᠳᠠᠶᠢᠯᠠᠯᠭ᠎ᠠ ᠪᠣᠯᠣᠨ᠎ᠠ᠃ ᠪᠦᠬᠦᠯᠢ ᠬᠤᠨᠢᠨ ᠰᠢᠭᠦᠰᠦ ᠤᠷᠤᠭᠤᠯᠬᠤ ᠭᠡᠳ᠋ᠡᠭ ᠨᠢ ᠬᠣᠨᠢ  ᠢᠢ ᠪᠦᠬᠦᠯᠢ ᠪᠠᠷ ᠨᠢ ᠴᠢᠨᠠᠬᠣ ᠬᠡᠰᠡᠨ ᠤᠴᠢᠷ ᠪᠢᠰᠢ᠂ ᠬᠠᠷᠢᠨ ᠬᠣᠨᠢᠨ  ᠤ ᠦᠶ᠎ᠡ ᠬᠡᠰᠢᠭᠦᠦ  ᠶᠢ ᠨᠢ ᠦᠶᠡᠯᠡᠨ ᠴᠢᠨᠠᠵᠤ᠂ ᠬᠡᠳ᠋ᠡᠰᠦ  ᠢᠢ ᠨᠢ ᠴᠢᠳᠬᠤᠨ᠂ ᠭᠡᠳᠡᠰᠦ ᠳᠣᠳ᠋ᠣᠷ ᠢ ᠨᠢ ᠴᠢᠨᠠᠵᠤ ᠪᠣᠯᠭᠣᠭᠠᠭᠠᠳ᠂ ᠬᠣᠨᠢᠨ  ᠤ ᠬᠡᠪᠳ᠋ᠡᠭᠡ ᠬᠡᠯᠪᠡᠷᠢ  ᠪᠠᠷ ᠰᠠᠪᠠᠨ ᠳ᠋ᠤ ᠰᠠᠪᠠᠯᠠᠨ ᠰᠢᠷᠡᠭᠡᠨ  ᠳᠤ ᠤᠷᠤᠭᠤᠯᠵᠤ᠂ ᠶᠣᠰᠣ ᠳᠠᠷᠠᠭᠠᠯᠠᠯ ᠳᠠᠢ ᠣᠭᠲᠣᠯᠣᠨ ᠢᠳᠡᠵᠡᠭᠡᠳᠡᠭ ᠶᠣᠮ᠃ ᠵᠣᠴᠢᠨ ᠴᠥᠭᠡᠨ ᠪᠣᠯ ᠪᠦᠬᠦᠯᠢ ᠬᠣᠨᠢᠨ ᠰᠢᠭᠦᠰᠦ ᠭᠠᠷᠭᠠᠬᠤ ᠭᠡᠰᠡᠨ ᠶᠠᠪᠤᠳᠠᠯ ᠪᠢᠰᠢ᠂ ᠭᠡᠪᠡᠴᠤ ᠬᠣᠨᠢᠨ  ᠤ ᠤᠭᠣᠴᠠ ᠵᠠᠪᠠᠯ ᠪᠠᠶᠢᠬᠣ ᠬᠡᠷᠡᠭᠳ᠋ᠡᠢ᠂ ᠡᠰᠡ ᠲᠡᠭᠡᠪᠡᠯ ᠪᠦᠬᠦᠯᠢ ᠳᠠᠯᠪᠢᠭᠰᠠᠨ ᠳ᠋ᠤ ᠳᠣᠭᠠᠴᠢᠬᠣ ᠦᠭᠡᠢ ᠶᠤᠮ᠃ ᠠᠷᠣ ᠬᠤᠷᠴᠢᠨᠴᠤᠳ ᠲᠦᠷᠪᠡᠨ ᠵᠦᠢᠯ  ᠦᠨ ᠠᠷᠭ᠎ᠠ ᠪᠠᠷ ᠰᠢᠭᠦᠰᠦ ᠲᠠᠪᠢᠰᠢᠯᠠᠳᠠᠭ᠄ ᠨᠢᠭᠡ ᠨᠢ᠂ ᠬᠤᠨᠢᠨ ᠤ ᠭᠡᠪᠳ᠋ᠡᠭᠡ ᠬᠡᠯᠪᠡᠷᠢ  ᠪᠠᠷ ᠦᠷᠦᠵᠦ ᠲᠠᠯᠪᠢᠨ᠎ᠠ᠃ ᠲᠠᠷᠤᠢ ᠲᠦᠷᠪᠡᠨ ᠮᠦᠴᠢ  ᠶᠢ ᠨᠢ ᠬᠡᠪᠲᠡᠭᠡ ᠬᠤᠨᠢᠨ ᠤ ᠬᠡᠯᠪᠡᠷᠢ ᠪᠡᠷ ᠲᠡᠪᠢᠰᠭᠡᠷᠯᠡᠨ ᠦᠷᠦᠵᠦ᠂ ᠲᠡᠬᠦᠨ ᠦ ᠬᠤᠶᠠᠷ ᠬᠠᠪᠢ ᠪᠠᠷ ᠨᠠᠢᠮᠠᠨ ᠬᠠᠪᠢᠷᠭ᠎ᠠ ᠵᠢᠭᠳᠡᠯᠡᠭᠦᠯᠦᠨ᠂ ᠭᠣᠣᠯ ᠳ᠋ᠣᠨᠢ ᠰᠡᠭᠡᠷ ᠲᠠᠯᠪᠢᠨ᠎ᠠ᠂ ᠡᠪᠴᠢᠬᠦᠦ  ᠶᠢ ᠭᠣᠣᠯᠳᠠᠭᠤᠯᠤᠨ ᠲᠠᠯᠪᠢ‍ᠵᠤ᠂ ᠡᠪᠴᠢᠭᠦᠦ ᠶᠢᠨ ᠲᠡᠭᠡᠷ᠎ᠡ ᠲᠠᠷᠤᠭᠰᠠᠨ ᠮᠠᠩᠨᠠᠢ ᠳᠡᠭᠡᠷ᠎ᠡ ᠨᠢ ︽                                              ︾        ᠲᠡᠮᠳᠡᠭ ᠲᠠᠢ ᠬᠣᠨᠢᠨ ᠲᠣᠯᠣᠭᠠᠢ  ᠪᠠᠨ ᠭᠣᠣᠯ ᠰᠠᠭᠤᠳᠠᠯ ᠥᠭᠡᠳᠡ ᠬᠠᠨᠳᠤᠭᠤᠯᠤᠨ ᠣᠷᠤᠭᠤᠯᠤᠨ᠎ᠠ᠃ ᠪᠣᠰᠤ ᠲᠠᠪᠠᠭ ᠲᠤ ᠡᠯᠢᠭᠡ ᠠᠭᠤᠰᠬᠢ ᠵᠢᠷᠦᠬᠡ ᠵᠢᠴᠢ ᠴᠢᠳᠬᠤᠭᠰᠠᠨ ᠭᠡᠳᠡᠰᠤ ᠲᠤᠳᠤᠷ ᠢ ᠲᠠᠪᠢᠰᠢᠯᠠᠨ᠎ᠠ᠃ ᠬᠣᠶᠠᠷ ᠨᠢ᠂ ᠲᠠᠪᠠᠭ ᠲᠦ ᠡᠯᠢᠭᠡ ᠠᠭᠣᠰᠬᠢ ᠵᠢᠷᠦᠬᠡ ᠬᠡᠳ᠋ᠡᠰᠦ ᠲᠤᠳᠤᠷ ᠵᠡᠷᠬᠡ  ᠢᠢ ᠦᠷᠦᠭᠰᠡᠨ ᠦ ᠲᠠᠷᠠᠭ᠎ᠠ᠂ ᠬᠠ ᠭᠤᠶ᠎ᠠ᠂ ᠬᠠᠪᠢᠷᠭ᠎ᠠ᠂ ᠡᠪᠴᠢᠬᠦᠦ᠂ ᠤᠭᠣᠴᠠ᠂ ᠳᠣᠯᠣᠭᠠᠢ  ᠢᠢ ᠳᠡᠰ ᠳᠠᠷᠠᠭ᠎ᠠ ᠳᠠᠢ ᠦᠷᠦᠵᠦ ᠳᠠᠪᠠᠭᠯᠠᠨ᠎ᠠ᠃ ᠭᠣᠷᠪᠠ ᠨᠢ᠂ ᠵᠣᠴᠢᠨ ᠴᠦᠭᠡᠨ ᠪᠣᠶᠣ ᠰᠢᠷᠡᠭᠡ ᠪᠠᠭ᠎ᠠ ᠦᠶᠡᠰ᠂ ᠡᠯ᠎ᠡ ᠬᠡᠰᠡᠭ ᠡᠴᠡ ᠬᠠᠭᠠᠰ ᠢ ᠨᠢ ᠤᠷᠤᠭᠤᠯᠤᠨ᠎ᠠ᠃ ᠲᠦᠷᠪᠡ ᠨᠢ᠂ ᠳᠠᠷᠤᠮ᠎ ᠢᠶᠠᠷ ᠵᠤᠴᠢᠯᠠᠬᠤ ᠶᠤᠰᠤᠨ᠂ ᠲᠠᠷᠤᠢ ᠬᠤᠨᠢᠨ ᠤ ᠬᠠ ᠭᠤᠶ᠎ᠠ᠂ ᠰᠡᠭᠡᠷ᠂ ᠬᠠᠪᠢᠷᠭ᠎ᠠ᠂ ᠡᠪᠴᠢᠭᠦᠦ ᠵᠡᠷᠭᠡ ᠶᠢ ᠳᠠᠪᠠᠭᠯᠠᠵᠣ᠂ ᠤᠭᠣᠴᠠ  ᠢᠢ ᠪᠦᠬᠦᠨ ‍ᠢ ᠭᠠᠷᠭᠠᠬᠣ ᠦᠬᠡᠢ᠂ ᠵᠦᠪᠬᠡᠨ ᠤᠭᠤᠴᠠᠨ ᠤ ᠲᠣᠯᠣᠭᠠᠢ ᠶᠢᠨ ᠬᠡᠰᠡᠭ ᠡᠴᠡ ᠠᠯᠠᠭ᠎ᠠ ᠳᠠᠷᠤᠮ ᠬᠢᠷᠢᠲᠡᠢ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠰᠦᠪᠡᠷᠭᠡ ᠲᠠᠭᠠᠯᠳᠤᠭᠤᠯᠤᠨ ᠠᠪᠤᠭᠰᠠᠨ ᠲᠠᠷᠤᠮ ᠢᠶᠠᠨ ᠲᠠᠯᠪᠢᠵᠤ᠂ ᠬᠤᠨᠢᠨ ᠲᠤᠯᠤᠭᠠᠢ ᠪᠠᠨ ᠲᠡᠭᠡᠵᠢᠯᠡᠨ ᠲᠠᠯᠪᠢᠨ᠎ᠠ᠃        ᠬᠡᠰᠢᠭᠳ᠋ᠡᠨ ᠬᠣᠰᠢᠭᠤᠨ  ᠳᠦ ᠵᠤᠮ᠎ᠠ ᠬᠤᠨᠢᠨ ᠰᠢᠭᠦᠰᠦ  ᠶᠢᠨ ᠳᠠᠶᠢᠯᠠᠯᠭ᠎ᠠ ᠬᠡᠵᠦ ᠪᠠᠶᠢᠳ᠋ᠠᠭ᠂ ᠡᠬᠦᠨ ‍ᠢ ᠳᠡᠦᠬᠡᠨ ᠳᠡᠭᠡᠷ᠎ᠠ︽ᠵᠤᠮ᠎ᠠ ᠰᠢᠭᠦᠰᠦ  ᠶᠢᠨ ᠲᠠᠶᠢᠯᠠᠯᠭ᠎ᠠ︾ᠬᠡᠳ᠋ᠡᠭ᠃ ᠬᠢᠬᠦ ᠠᠷᠭ᠎ᠠ ᠨᠢ ᠲᠦᠯᠦᠭᠡ ︵ᠰᠢᠳᠦᠯᠡᠩ ᠡᠷ᠎ᠡ ᠬᠣᠨᠢ)  ᠨᠢᠲᠤᠯᠵᠤ ᠶᠢ  ᠭᠡᠳᠡᠰᠦ ᠳᠣᠲᠣᠷ ᠡᠷᠬᠡᠲᠡᠨ ᠢ ᠨᠢ ᠭᠠᠷᠭᠠᠨ ᠠᠪᠴᠤ᠂ ᠠᠷᠠᠰᠣ  ᠢᠢ ᠨᠢ ᠦᠪᠴᠢᠯ ᠦᠭᠡᠢ  ᠪᠠᠷ ᠪᠣᠴᠠᠯᠤᠮ᠎ᠠ ᠤᠰᠤᠨ ᠳᠤ ᠵᠤᠯᠭᠠᠭᠠᠵᠤ᠂ ᠦᠰᠦ ᠶᠢ ᠨᠢ ᠬᠤᠰᠤᠵᠤ ᠠᠷᠢᠯᠭᠠᠨ᠂ ᠴᠢᠨᠠᠵᠤ ᠪᠣᠯᠭᠤᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠮᠣᠳᠤ ᠪᠣᠶᠣ ᠭᠠᠣᠯᠢᠨ ᠲᠠᠪᠠᠭ ᠲᠤ ᠳᠠᠪᠠᠭᠯᠠᠨ ᠲᠠᠯᠪᠢᠨ᠎ᠠ᠂ ᠬᠣᠨᠢᠨ ᠲᠣᠯᠣᠭᠠᠢ   ᠶᠢ ᠭᠣᠣᠯ ᠵᠣᠴᠢᠨ ᠤ ᠵᠦᠭ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠳᠠᠭ ᠬᠤᠷᠢᠮ ᠳᠠᠶᠢᠯᠠᠯᠭ᠎ᠠ ᠵᠡᠷᠭᠡ ᠳᠦ ᠬᠡᠷᠡᠭᠯᠡᠳᠡᠭ ᠪᠦᠬᠦᠯᠢ ᠰᠢᠭᠦᠰᠦ ᠪᠣᠯᠣᠨ᠎ᠠ᠃ ᠵᠣᠴᠢᠨ ᠤ ᠡᠮᠦᠨ᠎ᠡ ᠰᠢᠭᠦᠰᠦ ᠲᠡᠪᠰᠢᠭᠦᠯᠦᠭᠰᠡᠨ ᠦ ᠲᠠᠷᠠᠭ᠎ᠠ᠂ ᠰᠢᠭᠦᠰᠦ ᠳᠡᠪᠰᠢᠭᠦᠯᠬᠦ ᠢᠷᠤᠭᠡᠯ ᠮᠠᠭᠲᠠᠭᠠᠯ ᠤᠩᠰᠢᠵᠤ᠂ ᠲᠤᠰᠬᠠᠢ ᠬᠦᠮᠦᠨ ᠬᠠᠰᠢᠵᠤ ᠠᠬᠠᠮᠠᠳ ᠨᠠᠰᠤᠲᠠᠨ ᠠᠴᠠ ᠰᠢᠭᠦᠰᠦ ᠶᠢᠨ ᠳᠡᠭᠡᠵᠢ ᠶᠢ ᠳᠡᠭᠷᠢ ᠭᠠᠵᠠᠷ᠂ ᠨᠤᠲᠤᠭ ᠤᠰᠣᠨ  ᠤ ᠨᠠᠪᠳ᠋ᠠᠭ ᠰᠠᠪᠳ᠋ᠠᠭ᠂ ᠠᠭᠣᠯᠠ ᠤᠰᠣᠨ  ᠤ ᠡᠵᠡᠨ ᠰᠠᠬᠢᠭᠣᠰᠣ᠂ ᠮᠣᠳ᠋ᠣᠨ ᠰᠠᠬᠢᠭᠣᠰᠣ᠂ ᠡᠵᠡᠨ ᠬᠠᠨ᠂ ᠡᠪᠦᠬᠡ ᠳᠡᠭᠡᠳ᠋ᠦᠰ᠂ ᠴᠢᠳᠭᠦᠷ ᠲᠦ ᠡᠷᠭᠦᠭᠰᠡᠨ ᠦ ᠰᠡᠭᠦᠯᠡᠷ ᠰᠠᠶ᠋ᠢ ᠪᠣᠰᠤᠳ ᠬᠦᠮᠦᠰ ᠬᠠᠷᠢᠯᠴᠠᠨ ᠬᠦᠨᠳᠦᠯᠡᠯᠴᠡᠵᠦ ᠶᠤᠰᠤᠷᠬᠠᠭ ᠢᠶᠠᠷ ᠭᠠᠷ ᠬᠥᠳᠡᠯᠦᠨ ᠰᠢᠭᠦᠰᠦ ᠵᠣᠭᠤᠭᠯᠠᠨ᠎ᠠ᠃ ᠲᠡᠮᠳ᠋ᠡᠭᠯᠡᠯ ‍ᠢ ᠦᠨᠳ᠋ᠦᠰᠦᠯᠡᠪᠡᠯ᠂ ᠶᠤᠸᠠᠨ ᠤᠯᠣᠰ  ᠦᠨ ᠦᠶ᠎ᠠ  ᠳᠤ ᠪᠠᠶᠠᠷ  ᠦᠨ ᠶᠣᠰᠣᠯᠠᠯ᠂ ᠳᠠᠬᠢᠯᠭ᠎ᠠ᠂ ᠤᠷᠤᠭ ᠬᠣᠷᠢᠮ᠂ ᠵᠡᠷᠭᠡ ᠬᠡᠷᠬᠡᠮ ᠦᠨ ᠵᠠᠯᠭᠠᠮᠵᠢᠯᠠᠯ ᠵᠡᠷᠭᠡ ᠦᠪᠡᠳᠡᠭᠰᠢ ᠶᠡᠬᠡ ᠳᠠᠶᠢᠯᠠᠯᠭ᠎ᠠ ᠳᠤ ᠵᠤᠮ᠎ᠠ ᠬᠣᠨᠢᠨ ᠰᠢᠭᠦᠰᠦ ᠤᠷᠤᠭᠤᠯᠳᠠᠭ᠃ ᠴᠢᠩ ᠤᠯᠣᠰ  ᠦᠨ ᠦᠶ᠎ᠠ ᠳ᠋ᠤ᠂ ᠬᠡᠰᠢᠭᠲᠡᠨ ᠬᠣᠰᠢᠭᠣ ᠵᠢᠯ ᠪᠦᠷᠢ  ᠢᠢᠨ 12 ᠰᠠᠷ᠎ᠠ  ᠢᠢᠨ 25 ᠤ ᠡᠳ᠋ᠦᠷ ᠴᠢᠩ  ᠦᠨ ᠲᠥᠷᠥ ᠳᠦ ᠬᠣᠷᠢᠨ ᠲᠣᠯᠣᠭᠠᠢ ᠵᠣᠮᠠᠯᠠᠭᠰᠠᠨ ᠬᠤᠨᠢᠨ ᠤ ᠠᠯᠪᠠ ᠪᠠᠷᠢᠵᠤ᠂ ᠲᠤᠰᠬᠠᠶᠢᠯᠠᠨ ᠤᠷᠳ᠋ᠣᠨ  ᠤ ᠵᠤᠮ᠎ᠠ ᠬᠤᠨᠢᠨ ᠰᠢᠭᠦᠰᠦ ᠶᠢᠨ ᠳᠠᠶᠢᠯᠠᠯᠭ᠎ᠠ ᠳᠤ ᠬᠡᠷᠡᠭᠯᠡᠳ᠋ᠡᠭ᠃         ᠬᠠᠷᠠᠴᠢᠨ ᠬᠣᠰᠢᠭᠣᠨ  ᠳᠤ ᠰᠢᠷᠠᠭᠰᠠᠨ ᠭᠠᠬᠠᠢ  ᠢᠢᠨ ᠳᠠᠶᠢᠯᠠᠯᠭ᠎ᠠ ᠭᠡᠵᠤ ᠪᠠᠶᠢᠳᠠᠭ᠃ ᠵᠢᠯ ᠪᠦᠷᠢ  ᠢᠢᠨ ᠴᠠᠭᠠᠨ ᠰᠠᠷ᠎ᠠ᠂ ᠳᠠᠪᠣᠨ ᠰᠠᠷ᠎ᠠ  ᠢᠢᠨ ᠰᠢᠨ᠎ᠡ ᠶᠢᠨ ᠭᠣᠷᠪᠠᠨ᠂ ᠨᠠᠢᠮᠠᠨ ᠰᠠᠷ᠎ᠠ  ᠢᠢᠨ ᠠᠷᠪᠠᠨ ᠳᠠᠪᠣᠨ ᠳ᠋ᠤ ᠸᠠᠩ  ᠦᠨ ᠤᠷᠳ᠋ᠣᠨ ᠳ᠋ᠤ ᠶᠡᠭᠡ ᠳᠠᠬᠢᠯᠭ᠎ᠠ ᠬᠢᠵᠦ᠂ ᠰᠦᠮ᠎ᠠ ᠬᠡᠶᠢᠳ ᠬᠢᠭᠡᠳ ᠳᠡᠭᠡᠳ᠋ᠦᠰ  ᠦᠨ ᠰᠠᠬᠢᠭᠤᠰᠤ  ᠢᠶᠠᠨ ᠲᠠᠬᠢᠬᠤ ᠳᠤ ᠴᠦᠮ ᠪᠦᠬᠦᠯᠢ ᠭᠠᠬᠠᠢ ᠰᠢᠷᠠᠵᠤ ᠲᠠᠬᠢᠳᠠᠭ᠃ ᠳᠠᠭᠢᠯᠭ᠎ᠠ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ ᠤᠯᠠᠨ ᠬᠡᠰᠡᠭᠯᠡᠵᠦ᠂ ᠸᠠᠩ ᠨᠣᠶᠠᠨ ᠡᠴᠠ ᠠᠪᠣᠭᠠᠳ ᠵᠠᠯᠠᠨ ᠤ ᠵᠠᠩᠭᠢ ᠬᠦᠷᠲᠡᠯ᠎ᠡ ᠬᠦᠮᠦᠨ ᠪᠣᠯᠭᠠᠨ ᠳᠤ ᠨᠢᠭᠡ ᠬᠡᠰᠡᠭ ᠬᠤᠪᠢᠶᠠᠵᠤ  ᠥᠭᠳᠡᠭ᠂ ᠡᠬᠦᠨ  ᠢ︽ᠳᠠᠬᠢᠯᠭ᠎ᠠ  ᠢᠢᠨ ᠬᠡᠰᠢᠭ ᠬᠦᠷᠳᠡᠭᠡᠬᠦ︾ ᠭᠡᠳᠡᠭ᠃ ᠵᠢᠯ ᠪᠦᠷᠢ  ᠢᠢᠨ ᠬᠥᠬᠡᠭᠡ ᠰᠠᠷ᠎ᠠ  ᠳᠤ ᠸᠠᠩ ᠨᠣᠶᠠᠨ ᠪᠡᠭᠡᠵᠢᠩ ᠳᠦ ᠣᠴᠢᠵᠣ ᠵᠢᠰᠢᠶ᠎ᠡ ᠬᠦᠢᠴᠡᠳᠬᠡᠬᠦ  ᠪᠡᠷ ᠶᠠᠪᠣᠬᠣ ᠳ᠋ᠤ ᠪᠠᠨ ᠬᠠᠭᠠᠨ ᠳ᠋ᠤ ᠡᠷᠭᠦᠭᠦ ᠤᠬᠢ ᠰᠠᠶᠢᠨ ᠡᠳ᠋ ᠪᠣᠯᠬᠤ ᠰᠢᠷᠠᠭᠰᠠᠨ ᠭᠠᠬᠠᠢ   ᠵᠡᠷᠭᠡ  ᠡᠷᠭᠦᠴᠡ ᠪᠡᠯᠡᠳᠬᠡᠨ ᠠᠪᠠᠴᠢᠳᠠᠭ᠃ ᠰᠢᠷᠠᠭᠰᠠᠨ ᠭᠠᠬᠠᠢ  ᠢᠢ ᠬᠢᠬᠦ ᠠᠷᠭ᠎ᠠ ᠄  ᠳᠠᠪᠢ ᠵᠢᠷᠠᠨ ᠵᠢᠩ  ᠦᠨ ᠪᠣᠷᠳ᠋ᠣᠭᠰᠠᠨ ᠭᠠᠬᠠᠢ  ᠢᠢ  ᠨᠢᠲᠤᠯᠵᠤ ᠵᠤᠮᠠᠯᠠᠭᠠᠳ᠂ ᠭᠡᠳ᠋ᠡᠰᠦ ᠳᠣᠳ᠋ᠣᠷ ‍ᠢ ᠨᠢ ᠠᠪᠴᠤ ᠭᠠᠷᠭᠠᠨ᠂ ᠬᠡᠪᠡᠯᠢ ᠶᠢᠨ ᠬᠦᠨᠳᠡᠢ  ᠳ᠋ᠤᠨᠢ ᠳᠠᠪᠣᠰᠣ᠂ ᠭᠣᠨᠢᠳ ᠤᠨ ᠦᠷ᠎ᠡ᠂ ᠶᠠᠷᠮ᠎ᠠ᠂ ᠵᠢᠭᠠᠷᠳᠦ ᠭᠠᠪᠢᠷ᠎ᠠ  ᠢᠢᠨ ᠬᠠᠯᠢᠰᠣ᠂ ᠰᠣᠩᠭᠢᠨ᠎ᠠ᠂ ᠰᠠᠷᠢᠮᠰᠠᠭ ᠵᠡᠷᠭᠡ ᠠᠮᠳ᠋ᠠ ᠤᠷᠣᠭᠣᠯᠬᠣ ᠡᠳ᠋ ‍ᠢ ᠬᠢᠭᠰᠡᠨ  ᠦ ᠲᠠᠷᠠᠭ᠎ᠠ ᠪᠢᠳ᠋ᠡᠭᠦᠯᠡᠵᠦ᠂ ᠭᠣᠣᠯ ᠢᠶᠠᠷ ᠨᠢ ᠮᠣᠳᠤᠨ ᠰᠢᠳᠡᠮ ᠤᠷᠤᠭᠤᠯᠵᠤ ᠨᠡᠭᠦᠷᠡᠰᠦᠨ ᠭᠠᠯ ᠳᠡᠭᠡᠷ᠎ᠠ  ᠳᠠᠮᠨᠠᠨ ᠲᠠᠯᠪᠢᠵᠤ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠠᠯᠭᠤᠷᠬᠠᠨ  ᠰᠢᠷᠠᠵᠤ ᠪᠣᠯᠭᠣᠨ᠎ᠠ ᠃ ᠰᠢᠷᠠᠭᠰᠠᠨ ᠭᠠᠬᠠᠢ  ᠢᠢᠨ ᠤᠨᠴᠠᠯᠢᠭ ᠪᠣᠯ ᠄ ᠭᠠᠳᠠᠨᠠᠬᠢ ᠨᠢ ᠬᠡᠦᠷᠡᠭ ᠳᠣᠲᠤᠷᠠᠬᠢ ᠨᠢ ᠵᠦᠭᠡᠯᠡᠨ᠂ ᠦᠨᠦᠷ ᠠᠮᠳ᠋ᠠ ᠰᠠᠶᠢᠬᠠᠨ ᠪᠦᠭᠡᠳ ᠱᠠᠩᠳ᠋ᠠᠭᠣᠨ ᠦᠭᠡᠢ᠂ ᠤᠳᠠᠭᠠᠨ ᠬᠠᠳᠠᠭᠠᠯᠠᠵᠤ᠂ ᠬᠣᠯᠠ ᠲᠡᠭᠡᠭᠡᠪᠦᠷᠢᠯᠡᠭᠰᠡᠨ ᠴᠤ ᠡᠪᠳᠡᠷᠡᠵᠦ ᠬᠤᠪᠢᠷᠠᠳᠠᠭ ᠦᠭᠡᠢ᠃         ᠴᠠᠭᠠᠨ ᠢᠳ᠋ᠡᠭᠡᠨ  ᠴᠠᠭᠠᠨ ᠢᠳ᠋ᠡᠭᠡᠨ ᠪᠣᠯ ᠮᠣᠩᠭᠣᠯᠴᠣᠳ  ᠦᠨ ᠤᠯᠠᠮᠵᠢᠯᠠᠯᠳ᠋ᠣ ᠢᠳ᠋ᠡᠭᠡᠨ ᠪᠣᠯᠣᠨ᠎ᠠ᠃ ᠴᠠᠭᠠᠨ ᠢᠳᠡᠭᠡᠨ ᠢ ᠭᠣᠣᠯᠳᠠᠭᠤ ᠦᠨᠢᠶᠡᠨ ᠰᠦ᠂ ᠬᠤᠨᠢ ᠢᠮᠠᠭᠠᠨ ᠰᠦ᠂ ᠭᠡᠭᠦᠦ ᠶᠢᠨ ᠰᠦ᠂ ᠢᠩᠭᠡ ᠶᠢᠨ ᠰᠦ ᠪᠡᠷ ᠬᠢᠨ᠎ᠡ᠃ ᠤᠯᠠᠭᠠᠨᠬᠠᠳ᠋ᠠ ᠤᠷᠣᠨ  ᠤ ᠰᠠᠭᠠᠯᠢ  ᠢᠢᠨ ᠢᠳ᠋ᠡᠭᠡᠨ  ᠤ ᠲᠦᠷᠦᠯ ᠵᠦᠢᠯ ᠳ᠋ᠤ ᠲᠦᠬᠦᠭᠡᠢ ᠰᠦ᠂ ᠡᠭᠡᠳ᠋ᠡᠭᠰᠡᠨ ᠰᠦ᠂ ᠢᠰᠭᠡᠭᠰᠡᠨ ᠰᠦ᠂ ᠠᠶᠢᠷᠠᠭ ᠴᠠᠭ᠎ᠠ᠂ ᠰᠢᠷ᠎ᠠ ᠳᠣᠰᠣ᠂ ᠴᠦᠴᠦᠭᠡᠢ᠂ ᠠᠭᠠᠷᠤᠤᠯ ᠡᠭᠡᠵᠡᠭᠡᠢ᠂ ᠦᠷᠦᠮ᠎ᠠ᠂ ᠬᠣᠷᠣᠳ᠂ ᠵᠦᠬᠡᠬᠡᠢ᠂ ᠰᠦ ᠳᠠᠢ ᠴᠠᠢ᠂ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠵᠡᠷᠭᠡ ᠠᠷᠪᠠᠨ ᠬᠡᠳ᠋ᠦᠨ ᠵᠦᠢᠯ ᠪᠠᠶᠢᠳ᠋ᠠᠭ᠃         ᠲᠦᠭᠦᠭᠡᠢ ᠰᠦ ᠄ ᠰᠠᠶ᠋ᠢ ᠰᠠᠭᠠᠭᠰᠠᠨ ᠰᠦ ᠶᠢ ᠰᠢᠨ᠎ᠡ ᠰᠦ ᠪᠣᠶᠤ ᠲᠦᠬᠦᠬᠡᠢ ᠰᠦ ᠭᠡᠳᠡᠭ᠃ ᠲᠡᠷᠡ ᠨᠢ ᠴᠠᠭᠠᠨ ᠢᠳ᠋ᠡᠭᠡᠨ ᠬᠢᠬᠦ ᠲᠦᠭᠦᠭᠡᠢ ᠡᠳ᠋ ᠪᠣᠯᠬᠤ ᠪᠦᠭᠡᠳ ᠪᠠᠰᠠ ᠰᠢᠭᠤᠳ ᠤᠤᠭᠤᠵᠤ ᠪᠣᠯᠳᠠᠭ ᠪᠠ ᠬᠡᠦᠬᠡᠳ ᠤᠬᠵᠢᠬᠣ᠂ ᠬᠠᠭᠣᠷᠠᠭᠰᠠᠨ ᠪᠤᠳᠠᠭ᠎ᠠ ᠳᠡᠪᠲᠦᠭᠡᠨ ᠢᠳᠡᠬᠦ᠂ ᠴᠠᠢ  ᠰᠦᠯᠡᠵᠦ ᠪᠣᠯᠳᠠᠭ᠃ ᠡᠭᠦᠨ ᠢᠶᠡᠷ ᠪᠠᠷᠠᠬᠤ ᠦᠭᠡᠢ ᠲᠦᠭᠦᠬᠡᠢ ᠰᠦ ᠢᠢ ᠵᠦᠭᠡᠯᠡᠨ ᠭᠠᠯ ᠲᠡᠭᠡᠷ᠎ᠠ ᠪᠣᠴᠠᠯᠭᠠᠵᠤ ᠰᠢᠷ᠎ᠠ ᠳᠣᠰᠣ ᠪᠠᠭ᠎ᠠ ᠬᠢᠵᠦ ᠬᠠᠯᠠᠭᠣᠨ  ᠢᠢᠠᠷ ᠤᠣᠭᠣᠪᠠᠯ ᠬᠢᠮᠣᠷᠠᠭ᠎ᠠ ᠲᠠᠭᠰᠢᠭᠣᠷ ‍ᠢ ᠵᠠᠰᠠᠳ᠋ᠠᠭ᠃ ᠦᠨᠢᠶᠡᠨ ᠰᠦ᠂ ᠬᠤᠨᠢ ᠢᠮᠠᠭᠠᠨ ᠰᠦ᠂ ᠭᠡᠭᠦᠦ ᠶᠢᠨ ᠰᠦ᠂ ᠢᠩᠭᠡ ᠶᠢᠨ ᠰᠦ ᠨᠢ ᠲᠦᠭᠦᠭᠡᠢ ᠰᠦ  ᠢᠢᠨ ᠡᠬᠢ ᠢᠷᠡᠯᠳ᠋ᠡ ᠪᠣᠯᠬᠤ ᠪᠦᠭᠡᠳ ᠦᠨᠢᠶᠡᠨ ᠰᠦ ᠲᠡᠭᠡᠳᠦ ᠢᠳᠡᠭᠡᠨ ᠶᠤᠮ᠃   ᠬᠣᠷᠣᠳ ᠄ ᠲᠦᠬᠦᠭᠡᠢ ᠰᠦ  ᠶᠢ ᠰᠠᠪᠠᠨ ᠳ᠋ᠤ ᠬᠢᠵᠦ ᠡᠭᠡᠳᠡᠭᠦᠯᠪᠡᠯ᠂ ᠵᠥᠭᠡᠬᠡᠢ ᠪᠠ ᠡᠭᠡᠳᠡᠭᠰᠡᠨ ᠰᠦ ᠨᠢ ᠢᠯᠡ ᠲᠤᠳᠤᠷᠬᠠᠢ ᠢᠯᠭᠠᠷᠠᠵᠤ ᠭᠠᠷᠳᠠᠭ᠃ ᠳᠡᠭᠡᠷ᠎ᠡ ᠲᠠᠯ᠎ᠠ ᠶᠢᠨ ᠰᠢᠷᠭᠠᠯ ᠦᠩᠭᠡ ᠲᠠᠢ ᠲᠤᠰᠤ ᠠᠷᠪᠢᠨ ᠠᠭᠤᠯᠤᠭᠳᠠᠵᠤ ᠪᠠᠶᠢᠭ᠎ᠠ ᠬᠡᠰᠡᠭ ᠢ ᠵᠥᠭᠡᠬᠡᠢ ᠭᠡᠵᠤ ᠬᠡᠯᠡᠳᠡᠭ ᠪᠠ ᠡᠭᠦᠨ ᠢ ᠬᠠᠮᠤᠵᠤ ᠠᠪᠤᠨ᠎ᠠ᠃ ᠲᠤᠤᠷᠠᠬᠢ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠲᠤᠨᠢ ᠤᠭᠤᠷᠠᠭ ᠠᠷᠪᠢᠨ ᠠᠭᠤᠯᠤᠭᠳᠠᠵᠤ ᠪᠠᠶᠢᠳᠠᠭ ᠴᠠᠭᠠᠨ ᠥᠩᠭᠡ ᠲᠠᠢ ᠬᠡᠰᠡᠭᠷᠡᠭ ᠪᠡᠶ᠎ᠡ ᠶᠢ ᠡᠭᠡᠳᠡᠭᠰᠡᠨ ᠰᠦ ᠭᠡᠳᠡᠭ᠃ ᠵᠥᠭᠡᠭᠡᠢ ᠶᠢ ᠨᠢ ᠬᠠᠮᠤᠵᠤ ᠠᠪᠤᠭᠰᠠᠨ ᠤ ᠲᠠᠷᠠᠭ᠎ᠠ ᠦᠯᠡᠳᠡᠭᠰᠡᠨ ᠡᠭᠡᠳᠡᠭᠰᠡᠨ ᠰᠦ ᠪᠡᠨ ᠲᠣᠭᠤᠭᠠᠨ ᠳᠤ ᠬᠢᠵᠦ ᠪᠣᠴᠠᠯᠭᠠᠬᠤ ᠳᠤ ᠰᠦ ᠨᠢ ᠬᠦᠰᠢᠵᠤ ᠰᠢᠷᠠᠰᠤ ᠨᠢ ᠢᠯᠭᠠᠷᠠᠨ᠎ᠠ᠂ ᠪᠣᠴᠠᠯᠭᠠᠬᠣ  ᠢᠢᠨ ᠳᠠᠭᠣ ᠰᠢᠷ᠎ᠠ ᠤᠰᠣ  ᠢᠢ ᠨᠢ ᠪᠦᠷᠢᠨ ᠱᠦᠭᠦᠷᠡᠭᠦᠯᠦᠭᠡᠳ ᠰᠠᠶᠢᠲᠤᠷ ᠨᠣᠬᠣᠯᠠᠨ ᠨᠢᠭᠳ᠋ᠠ ᠪᠣᠯᠭᠠᠭᠠᠳ ᠬᠣᠷᠣᠳ  ᠦᠨ ᠬᠡᠪ ᠲᠦ ᠲᠠᠷᠤᠵᠤ ᠬᠡᠪᠰᠢᠭᠦᠯᠦᠭᠡᠳ ᠬᠡᠪ ᠡᠴᠠ ᠭᠠᠷᠭᠠᠨ ᠬᠠᠳᠠᠭᠠᠪᠠᠯ ᠬᠣᠷᠣᠳ ᠪᠣᠯᠣᠨ᠎ᠠ᠃ ᠬᠡᠰᠢᠭᠳ᠋ᠡᠨ ᠬᠣᠰᠢᠭᠣᠨ  ᠤ ᠬᠣᠷᠣᠳ ᠬᠢᠬᠦ ᠨᠢ ᠪᠣᠰᠣᠳ ᠭᠠᠵᠠᠷ ᠡᠴᠠ ᠢᠯᠭᠠᠭ᠎ᠠ ᠳᠠᠢ ᠪᠠᠶᠢᠳᠠᠭ᠂ ᠲᠡᠳᠡ ᠬᠤᠷᠤᠳ ᠢ ᠨᠤᠬᠤᠯᠠᠵᠤ ᠨᠡᠶᠢᠯᠡᠪᠡᠯ ᠬᠡᠪ  ᠲᠤ ᠪᠠᠨ ᠲᠠᠷᠤᠳᠠᠭ᠃ ᠪᠠᠰᠠ ᠬᠣᠷᠣᠳ ᠬᠢᠬᠦ  ᠳᠤ ᠪᠠᠨ ᠲᠦᠭᠦᠭᠡᠢ ᠰᠦ ᠢᠢ ᠪᠠᠭ᠎ᠠ ᠬᠡᠮᠵᠢᠶ᠎ᠠ ᠪᠠᠷ ᠬᠢᠵᠦ ᠨᠣᠬᠣᠯᠠᠳ᠋ᠠᠭ ᠴᠤ ᠪᠣᠢ᠂ ᠡᠶᠢᠮᠦᠷᠬᠦ ᠬᠣᠷᠣᠳ ᠨᠢ ᠬᠠᠳ᠋ᠠᠭᠠᠭᠰᠠᠨ  ᠤ ᠳᠠᠷᠠᠭ᠎ᠠ ᠦᠩᠭᠡ ᠨᠢ ᠴᠠᠭᠠᠨ᠂ ᠵᠦᠭᠡᠯᠡᠨ᠂ ᠦᠨᠦᠷ ᠠᠮᠳ᠋ᠠ ᠨᠢ ᠴᠣ ᠰᠣᠷᠭᠣᠭ ᠰᠠᠶᠢᠬᠠᠨ ᠪᠠᠶᠢᠳ᠋ᠠᠭ᠃ ᠳᠠᠬᠢᠪᠠᠯ ᠲᠦᠭᠦᠭᠡᠢ ᠰᠦ ᠪᠠᠨ ᠡᠬᠡᠳ᠋ᠡᠭᠦᠯᠬᠦ ᠦᠭᠡᠢ ᠪᠠᠷ ᠲᠣᠭᠣᠭᠠᠨ ᠳ᠋ᠤ ᠬᠢᠵᠦ ᠪᠣᠴᠠᠯᠭᠠᠭᠠᠳ ᠦᠷᠦᠮ᠎ᠠ ᠭᠠᠷᠭᠠᠨ ᠠᠪᠴᠤ᠂ ᠱᠠ ᠪᠦᠰᠡ ᠪᠠᠷ ᠱᠦᠭᠦᠷᠡᠬᠦᠯᠦᠨ ᠬᠢᠭᠰᠡᠨ ᠬᠣᠷᠣᠳ︵ᠪᠢᠰᠢᠯᠠᠭ︶ ᠨᠢ ᠢᠰᠬᠦᠯᠡᠩ ᠠᠮᠳ᠋ᠠ ᠦᠭᠡᠢ᠂ ᠰᠢᠬᠢᠷ ᠨᠠᠭᠠᠯᠳᠤᠭᠤᠯᠤᠭᠰᠠᠨ ᠬᠣᠷᠣᠳ ᠵᠠᠭᠤᠰᠢ ᠬᠢᠬᠦ ᠳ᠋ᠤ ᠬᠠᠮᠤᠭ ᠰᠠᠶᠢᠨ ᠲᠦᠭᠦᠭᠡᠢ ᠮᠠᠲ᠋ᠧᠷᠢᠶᠠᠯ ᠪᠣᠯᠳ᠋ᠠᠭ᠂ ᠭᠡᠪᠡᠴᠣ ᠠᠮᠠᠷᠬᠠᠨ ᠴᠢᠨᠠᠷ ᠨᠢ ᠬᠤᠪᠢᠷᠠᠵᠤ ᠡᠪᠳᠡᠷᠡᠳᠡᠭ ᠲᠣᠯᠠ ᠨᠠᠮᠣᠷ ᠡᠪᠣᠯ ᠰᠠᠶᠢ ᠬᠢᠳ᠋ᠡᠭ᠃         ᠦᠷᠦᠮ᠎ᠠ ᠄ ᠰᠠᠭᠠᠭᠰᠠᠨ ᠰᠦ ᠪᠠᠨ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ᠂ ᠳᠡᠭᠡᠷ᠎ᠡ ᠨᠢ ᠵᠢᠭᠠᠬᠠᠨ ᠬᠠᠭᠤᠷᠤᠭᠰᠠᠨ ᠪᠤᠳᠠᠭ᠎ᠠ ᠬᠢᠵᠦ᠂ ᠵᠦᠭᠡᠯᠡᠨ ᠭᠠᠯ ᠳᠡᠭᠡᠷ᠎ᠡ ᠪᠣᠴᠠᠯᠭᠠᠬᠤ ᠶᠢᠨ ᠲᠠᠭᠤ ᠰᠢᠨᠠᠭ᠎ᠠ ᠪᠠᠷ ᠤᠯᠠᠨᠲᠠ ᠰᠠᠮᠤᠷᠤᠨ ᠬᠦᠭᠡᠰᠦᠷᠡᠭᠦᠯᠵᠦ ᠪᠤᠴᠠᠯᠬᠤ ᠪᠠᠨ ᠪᠣᠯᠢᠭᠰᠠᠨ ᠦᠶ᠎ᠡ ᠳᠦ ᠭᠠᠯ ᠢ ᠲᠠᠷᠤᠨ᠎ᠠ᠃ ᠳᠡᠭᠡᠭᠦᠷ ᠨᠢ ᠬᠣᠷᠣᠭᠣ ᠵᠣᠵᠠᠭᠠᠨ ᠴᠣᠬᠣᠷᠳᠠᠨ ᠴᠠᠷᠴᠠᠭᠰᠠᠨ ᠢ ᠥᠷᠥᠮ᠎ᠡ ᠭᠡᠳᠡᠭ᠃ ᠦᠷᠦᠮ᠎ᠠ ᠨᠢ ᠰᠦᠨ ᠴᠠᠭᠠᠨ ᠦᠩᠭᠡᠳ᠋ᠡᠢ᠂ ᠠᠩᠭᠢᠯᠣᠮ᠎ᠠ ᠰᠠᠶᠢᠬᠠᠨ ᠦᠨᠦᠷ ᠲᠠᠢ ᠬᠡᠦᠷᠡᠭ ᠠᠮᠳ᠋ᠠᠳ᠋ᠠᠢ᠂ ᠴᠠᠭᠠᠨ ᠢᠳ᠋ᠡᠭᠡᠨ  ᠤ ᠤᠬᠢ ᠪᠦᠳ᠋ᠦᠭᠡᠭᠳ᠋ᠡᠭᠦᠨ ᠪᠣᠯᠣᠨ᠎ᠠ᠃         ᠰᠢᠷ᠎ᠠ ᠳᠣᠰᠣ ᠄ ᠡᠭᠡᠳᠡᠭᠰᠡᠨ ᠰᠦ ᠶᠢᠨ ᠲᠡᠭᠡᠷᠡᠬᠢ ᠵᠥᠭᠡᠬᠡᠢ ᠶᠢ ᠬᠠᠮᠤᠵᠤ ᠠᠪᠤᠭᠠᠳ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ ᠡᠷᠴᠢᠭᠡᠭᠡᠳ ᠵᠦᠭᠡᠯᠡᠨ ᠭᠠᠯ  ᠢᠢᠠᠷ ᠪᠣᠴᠠᠯᠭᠠᠬᠤ ᠶᠢᠨ ᠬᠠᠮᠲᠤ ᠰᠢᠨᠠᠭ᠎ᠠ ᠪᠠᠷ ᠠᠭᠠᠵᠢᠮ ᠬᠦᠳᠡᠯᠭᠡᠪᠡᠯ ᠲᠤᠩᠭᠠᠯᠠᠭ ᠰᠢᠷ᠎ᠠ ᠲᠣᠰᠤ ᠢᠯᠭᠠᠷᠠᠨ ᠭᠠᠷᠳᠠᠭ᠃ ᠰᠢᠷ᠎ᠠ ᠲᠣᠰᠤ ᠨᠢ ᠮᠠᠯᠴᠢᠳ  ᠦᠨ ᠬᠣᠭᠣᠯᠠ ᠪᠣᠳᠠᠭᠠᠨ ᠳ᠋ᠤ ᠳᠣᠳ᠋ᠠᠭᠳ᠋ᠠᠵᠣ ᠪᠣᠯᠣᠰᠢ ᠦᠭᠡᠢ ᠭᠣᠣᠯ ᠢᠳ᠋ᠡᠭᠡᠨ ᠪᠣᠯᠬᠤ ᠶᠤᠮ᠃ ᠰᠢᠷ᠎ᠠ ᠳᠣᠰᠣ ᠢᠯᠭᠠᠷᠠᠭᠣᠯᠣᠭᠠᠳ ᠦᠯᠡᠳ᠋ᠡᠭᠰᠡᠨ ᠲᠤᠨᠳᠠᠰᠤ  ᠶᠢ ᠵᠦᠴᠦᠭᠡᠢ ᠭᠡᠨ᠎ᠠ᠃ ᠮᠦᠨᠴᠦ ᠴᠠᠭᠠᠨ ᠢᠳ᠋ᠡᠭᠡᠨ  ᠤ ᠴᠢᠬᠤᠯᠠ ᠨᠢᠬᠡ ᠵᠦᠢᠯ ᠪᠣᠯᠣᠨ᠎ᠠ᠃         ᠠᠶᠢᠷᠠᠭ ᠄ ᠬᠣᠷᠣᠳ ᠬᠢᠬᠦ ᠳ᠋ᠤ ᠢᠯᠭᠠᠷᠠᠭᠣᠯᠣᠨ ᠭᠠᠷᠭᠠᠭᠰᠠᠨ ᠰᠢᠷᠠᠰᠤ ᠪᠠᠨ ᠰᠠᠪᠠᠨ ᠳ᠋ᠤ ᠬᠢᠵᠦ ᠳᠡᠭᠡᠷ᠎ᠠ ᠨᠢ ᠵᠣᠬᠢᠬᠣ ᠬᠡᠮᠵᠢᠶᠡᠨ  ᠤ ᠲᠦᠭᠦᠭᠡᠢ ᠰᠦ ᠬᠣᠯᠢᠭᠠᠳ ᠬᠦᠴᠢ ᠤᠷᠤᠭᠤᠯᠤᠨ᠎ᠠ᠂ ᠨᠢᠭᠡᠨ ᠳᠠᠪᠬᠤᠷ ᠬᠦᠬᠡᠰᠦᠷᠬᠡᠭ ᠪᠦᠷᠢᠯᠳᠦᠨ ᠬᠦᠴᠢᠯᠢᠭ ᠦᠨᠦᠷ ᠲᠠᠢ ᠪᠣᠯᠬᠣ ᠦᠶ᠎ᠠ ᠳ᠋ᠤ ᠤᠣᠭᠣᠵᠣ ᠪᠣᠯᠣᠨ᠎ᠠ᠃ ᠠᠶᠢᠷᠠᠭ ᠨᠢ ᠪᠠᠰᠠᠴᠤ ᠰᠠᠭᠠᠯᠢ  ᠢᠢᠨ ᠠᠷᠢᠬᠢᠨ  ᠤ ᠬᠦᠷᠦᠩᠭᠡ ᠪᠣᠯᠣᠨ᠎ᠠ᠃ ᠠᠶᠢᠷᠠᠭ ᠨᠢ ᠠᠷᠢᠬᠢ ᠰᠡᠷᠭᠦᠬᠡᠬᠦ᠂ ᠬᠣᠣᠷ ᠲᠠᠶᠢᠯᠬᠤ᠂ ᠬᠣᠳ᠋ᠣᠭᠣᠳ᠋ᠣ  ᠢᠢ ᠰᠠᠶᠢᠵᠢᠷᠠᠭᠣᠯᠬᠣ ᠦᠢᠯᠡᠳ᠋ᠦᠯ ᠳᠠᠢ᠂ ᠬᠠᠭᠣᠴᠢᠨ  ᠦ ᠴᠠᠭ ᠲᠦ ᠪᠠᠰᠠ ᠠᠷᠠᠰᠣ ᠰᠢᠷᠢ ᠡᠯᠳᠡᠬᠦ ᠳᠦ ᠬᠡᠷᠡᠭᠯᠡᠵᠦ ᠪᠠᠶᠢᠵᠠᠢ᠃         ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠄ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ  ᠢᠢ ᠠᠶᠢᠷᠠᠭ  ᠢᠢᠠᠷ ᠬᠦᠷᠦᠩᠭᠡ ᠪᠣᠯᠭᠠᠵᠣ ᠬᠢᠳ᠋ᠡᠭ᠃ ᠨᠡᠷᠡᠬᠦ ᠠᠷᠭ᠎ᠠ ᠪᠠᠷᠢᠯ ᠨᠢ ᠬᠠᠷ᠎ᠠ ᠠᠷᠢᠬᠢ ᠨᠡᠷᠡᠬᠦ ᠳᠠᠢ ᠠᠳ᠋ᠠᠯᠢᠪᠳ᠋ᠣᠷ ᠪᠠᠶᠢᠳᠠᠭ᠃ ᠬᠦᠢᠴᠡᠳ ᠢᠰᠭᠡᠭᠰᠡᠨ ᠠᠶᠢᠷᠠᠭ  ᠢᠶᠠᠨ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ᠂ ᠵᠤᠬᠢᠬᠤ ᠬᠡᠮᠵᠢᠶᠡᠨ  ᠤ ᠲᠦᠭᠦᠬᠡᠢ ᠰᠦ ᠬᠢᠬᠡᠳ᠂ ᠳᠣᠭᠣᠭᠠᠨ ᠳᠡᠭᠡᠷ᠎ᠠ ᠪᠠᠨ ᠪᠦᠷᠬᠦᠭᠡᠷ︵ᠱᠣᠪᠤᠭᠤᠷ ᠬᠡᠯᠪᠡᠷᠢᠲᠦ ᠬᠠᠯᠢᠰᠤᠯᠠᠭᠰᠠᠨ ᠪᠣᠷᠣ ᠪᠣᠷᠭᠠᠰᠤ ᠪᠣᠶᠤ ᠬᠠᠶᠢᠯᠠᠰᠤᠨ ᠪᠣᠷᠭᠠᠰᠤ ᠪᠠᠷ ᠬᠦᠷᠦᠭᠰᠡᠨ ᠪᠦᠷᠭᠦᠭᠡᠷ ᠭᠠᠳᠠᠭᠤᠷ ᠨᠢ ᠨᠢᠭᠡᠨ ᠳᠠᠪᠬᠤᠷ ᠨᠠᠩᠭᠢ ᠰᠢᠷᠤᠶ ᠪᠠᠷ ᠰᠢᠪᠠᠳᠡᠭ︶ ᠢᠶᠠᠨ ᠲᠠᠭᠠᠷᠠᠭᠤᠯᠤᠨ ᠪᠢᠳᠡᠭᠦᠮᠵᠢᠯᠡᠵᠦ᠂ ᠪᠦᠷᠬᠦᠭᠡᠷ ᠦᠨ ᠳᠣᠳ᠋ᠣᠷ᠎ᠠ ᠲᠤᠰᠬᠤᠭᠤᠷ ᠪᠣᠷᠲᠤᠭᠤ ᠪᠠᠨ ᠳᠡᠭᠦᠵᠢᠯᠡᠵᠦ᠂ ᠪᠦᠷᠬᠦᠭᠡᠷ ᠦᠨ ᠲᠡᠭᠡᠷ᠎ᠠ ᠵᠢᠯᠡᠪᠴᠢ ᠪᠡᠨ ᠲᠠᠯᠪᠢᠵᠤ᠂ ᠲᠤᠳᠤᠷ᠎ᠠ ᠨᠢ ᠬᠦᠢᠳ᠋ᠡᠨ ᠤᠰᠣ ᠬᠢᠳᠡᠭ᠃ ᠪᠦᠷᠬᠦᠭᠡᠷ ᠪᠣᠯᠣᠨ ᠵᠢᠯᠡᠪᠴᠢ ᠶᠢᠨ ᠵᠠᠪᠰᠠᠷ ᠢ ᠰᠢᠪᠡᠵᠦ᠂ ᠠᠷᠭᠠᠯ ᠤᠨ ᠭᠠᠯ ᠢᠶᠠᠷ ᠠᠭᠠᠵᠢᠮᠬᠠᠨ ᠬᠠᠯᠠᠭᠤᠯᠤᠨ᠎ᠠ᠃ ᠪᠣᠴᠠᠯᠣᠭᠰᠠᠨ ᠠᠶᠢᠷᠠᠭ ᠠᠭᠤᠷᠰᠢᠵᠤ ᠵᠢᠯᠡᠪᠴᠢᠨ ᠤ ᠢᠷᠣᠭᠠᠷ  ᠤᠨ ᠬᠦᠢᠳᠡᠨ ᠳᠦ ᠤᠴᠠᠷᠠᠵᠤ ᠤᠰᠣᠨ ᠳᠣᠰᠣᠯ ᠪᠣᠯᠣᠨ ᠲᠤᠰᠬᠤᠭᠤᠷ ᠪᠣᠷᠳᠤᠭᠤ ᠳᠤ ᠲᠣᠰᠣᠯᠠᠳ᠋ᠠᠭ᠃ ᠡᠨᠡ ᠨᠢ ᠲᠠᠷᠤᠢ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠪᠣᠯᠣᠨ᠎ᠠ᠃ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ  ᠢᠢ ᠮᠠᠯᠴᠢᠨ ᠠᠶᠢᠯ ᠪᠣᠯᠭᠠᠨ ᠪᠦᠷ ᠨᠡᠷᠡᠵᠦ ᠴᠢᠳ᠋ᠠᠳ᠋ᠠᠭ᠃ ᠰᠠᠭᠠᠯᠢ  ᠢᠢᠨ ᠠᠷᠢᠬᠢᠨ  ᠤ ᠴᠢᠨᠠᠷ ᠵᠦᠭᠡᠯᠡᠨ᠂ ᠭᠣᠰᠢᠭᠣᠨ ᠠᠮᠳ᠋ᠠ ᠦᠭᠡᠢ᠂ ᠭᠡᠪᠡᠴᠤ ᠬᠣᠶᠢᠨᠠᠬᠢ ᠬᠦᠴᠦ ᠮᠠᠰᠢ ᠶᠡᠬᠡ᠂ ᠰᠣᠭᠳ᠋ᠣᠬᠣ ᠨᠢ ᠤᠳ᠋ᠠᠭᠠᠨ ᠪᠣᠯᠪᠠᠴᠣ ᠰᠡᠷᠬᠦᠬᠦ ᠨᠢ ᠴᠤ ᠪᠠᠰᠠ ᠤᠳ᠋ᠠᠭᠠᠨ ᠪᠠᠶᠢᠳ᠋ᠠᠭ᠃ ᠮᠣᠩᠭᠣᠯ ᠦᠨᠳ᠋ᠦᠰᠦᠳ᠋ᠡᠨ  ᠤ ᠮᠠᠯᠴᠢᠳ ᠲᠦᠮᠡᠨ ᠦᠶ᠎ᠠ ᠤᠯᠠᠷᠢᠨ ᠦᠨᠳ᠋ᠦᠷᠯᠢᠭ ᠬᠦᠢᠳ᠋ᠡᠨ ᠤᠷᠣᠨ ᠳ᠋ᠤ ᠨᠣᠳ᠋ᠣᠭᠯᠠᠵᠣ᠂ ᠬᠦᠢᠳ᠋ᠡᠨ ‍ᠢ ᠰᠡᠷᠭᠡᠶᠢᠯᠡᠬᠦ ᠶᠢᠨ ᠳᠣᠯᠠᠳ᠋ᠠ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠡᠳ᠋ᠯᠡᠬᠦ ᠳᠣᠷᠠᠳ᠋ᠠᠢ ᠪᠠᠶᠢᠳ᠋ᠠᠭ᠃ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠨᠢ ᠮᠦᠨ ᠴᠤ ᠵᠣᠴᠢᠨ ᠳᠠᠶᠢᠯᠠᠬᠣ ᠤᠬᠢ ᠰᠠᠶᠢᠨ ᠤᠮᠳ᠋ᠠᠭᠠᠨ ᠪᠣᠯᠣᠨ᠎ᠠ᠃ ᠤᠯᠠᠭᠠᠨᠬᠠᠳᠠ ᠬᠤᠳᠠ ᠳ᠋ᠤ ᠬᠡᠰᠢᠭᠳ᠋ᠡᠨ ᠬᠣᠰᠢᠭᠣᠨ  ᠤ ᠰᠠᠭᠠᠯᠢ ᠢᠢᠨ ᠠᠷᠢᠬᠢ ᠬᠠᠮᠣᠭ ᠡᠴᠠ ᠨᠡᠷᠡᠳ᠋ᠡᠢ᠂ ᠪᠠᠭᠠᠷᠢᠨ ᠵᠡᠭᠦᠨ ᠬᠤᠰᠢᠭᠤ ᠪᠣᠯᠣᠨ ᠪᠠᠷᠠᠭᠣᠨ ᠪᠠᠭᠠᠷᠢᠨ ᠬᠣᠰᠢᠭᠣᠨ  ᠤ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠳᠠᠷᠠᠭᠠᠯᠠᠳᠠᠭ᠃         ᠡᠭᠡᠳ᠋ᠡᠭᠰᠡᠨ ᠰᠦ ᠄ ᠰᠠᠭᠠᠭᠰᠠᠨ  ᠰᠦ ᠪᠠᠨ ᠴᠡᠪᠡᠷ ᠰᠠᠪᠠ ᠰᠠᠭᠠᠯᠢ ᠳᠤ ᠬᠢᠵᠦ ᠬᠠᠯᠭᠤᠨ ᠬᠦᠢᠳᠡᠨ ᠢ ᠨᠢ ᠲᠡᠩᠴᠡᠭᠦᠯᠦᠨ ᠲᠠᠯᠪᠢᠪᠠᠯ  ᠰᠦ ᠨᠢ ᠦᠪᠡᠷ  ᠢᠢᠠᠨ ᠢᠰᠴᠦ ᠡᠭᠡᠳ᠋ᠡᠳ᠋ᠡᠭ᠃ ᠲᠣᠰᠣᠯᠢᠭ ᠡᠳ᠋ ᠪᠠ ᠤᠭᠣᠷᠠᠭ ᠡᠳ᠋ ᠨᠢ ᠢᠯᠡ ᠳᠣᠳ᠋ᠣ ᠢᠯᠭᠠᠷᠠᠵᠣ᠂ ᠳᠡᠭᠡᠷ᠎ᠠ ᠳᠠᠯ᠎ᠠ  ᠢᠢᠨ ᠰᠢᠷᠭᠠᠯ ᠦᠩᠭᠡ ᠲᠠᠢ ᠲᠤᠰᠤ ᠠᠷᠪᠢᠨ ᠠᠭᠤᠯᠤᠭᠳᠠᠵᠤ ᠪᠠᠶᠢᠬᠤ ᠬᠡᠰᠡᠭ ᠢ ᠵᠦᠭᠡᠭᠡᠢ ᠭᠡᠵᠦ᠂ ᠲᠤᠤᠷᠠᠬᠢ ᠬᠡᠰᠡᠭ ᠲᠤᠨᠢ ᠤᠭᠤᠷᠠᠭ ᠠᠷᠪᠢᠨ ᠠᠭᠤᠯᠤᠭᠳᠠᠵᠤ ᠪᠠᠶᠢᠳᠠᠭ ᠴᠠᠭᠠᠨ ᠦᠩᠭᠡ ᠲᠠᠢ ᠬᠡᠰᠡᠭᠷᠡᠭ ᠪᠡᠶ᠎ᠡ ᠶᠢ ᠡᠭᠡᠳ᠋ᠡᠭᠰᠡᠨ  ᠰᠦ ᠭᠡᠨ᠎ᠠ᠃ ᠡᠭᠡᠳ᠋ᠡᠭᠰᠡᠨ  ᠰᠦ  ᠢᠢ ᠰᠢᠬᠢᠷ ᠬᠠᠭᠣᠷᠣᠭᠰᠠᠨ ᠪᠤᠳᠠᠭ᠎ᠠ ᠳᠠᠢ ᠵᠢᠭᠤᠷᠠᠵᠤ ᠢᠳ᠋ᠡᠪᠡᠯ ᠦᠨᠦᠷ ᠠᠩᠬᠢᠯᠦᠮ᠎ᠠ ᠥᠩᠭᠡ ᠠᠮᠲᠠ ᠰᠠᠶᠢᠬᠠᠨ ᠰᠢᠮ᠎ᠠ ᠲᠡᠵᠢᠭᠡᠯ ᠦᠨᠳ᠋ᠦᠷ ᠪᠠᠶᠢᠳ᠋ᠠᠭ᠃ ᠰᠦ ᠶᠢ ᠡᠭᠡᠳᠡᠭᠦᠯᠵᠦ ᠪᠠᠶᠢᠭ᠎ᠠ ᠨᠢ ᠭᠣᠣᠯᠳ᠋ᠠᠭᠣ ᠬᠣᠷᠣᠳ ᠬᠢᠬᠦ ᠪᠣᠶᠣ ᠵᠦᠭᠡᠭᠡᠢ︵ᠵᠠᠷᠢᠮ ᠭᠠᠵᠠᠷ ᠪᠠᠰᠠ ᠦᠷᠦᠮ᠎ᠠ ᠭᠡᠳ᠋ᠡᠭ ︶ᠠᠪᠬᠣ ᠳ᠋ᠤ ᠬᠡᠷᠡᠭᠯᠡᠳ᠋ᠡᠭ᠃         ᠠᠭᠠᠷᠣᠣᠯ ᠄ ᠰᠠᠭᠠᠯᠢ  ᠢᠢᠨ ᠠᠷᠢᠬᠢ ᠨᠡᠷᠡᠬᠦ ᠳ᠋ᠤ ᠲᠣᠨᠣᠭᠰᠠᠨ ᠠᠭᠰᠢᠭᠤᠷᠠᠭ ᠰᠢᠷᠠᠰᠤ ᠢᠢ ᠨᠢ ᠱᠦᠭᠦᠷᠡᠬᠦᠯᠦᠭᠰᠡᠨ  ᠤ ᠳᠠᠷᠠᠭ᠎ᠠ ᠠᠳᠬᠤᠵᠤ ᠨᠡᠶᠢᠯᠡᠭᠦᠯᠦᠭᠡᠳ ᠬᠢᠭᠰᠡᠨ ᠢᠳ᠋ᠡᠭᠡᠨ ᠪᠣᠯᠣᠨ᠎ᠠ᠃ ᠬᠠᠳ᠋ᠠᠭᠠᠭᠰᠠᠨ  ᠤ ᠳᠠᠷᠠᠭ᠎ᠠ ᠢᠳ᠋ᠡᠳ᠋ᠡᠭ᠂ ᠢᠰᠬᠦᠯᠡᠩ ᠪᠦᠭᠡᠳ ᠰᠢᠬᠢᠷᠯᠢᠭ ᠠᠮᠳ᠋ᠠᠳ᠋ᠠᠢ᠂ ᠬᠡᠦᠬᠡᠳ ᠪᠠ ᠡᠮᠡᠭᠳ᠋ᠠᠶᠢᠴᠣᠳ  ᠦᠨ ᠢᠳ᠋ᠡᠬᠦ ᠲᠣᠷᠠᠳ᠋ᠠᠢ ᠰᠠᠭᠠᠯᠢ  ᠢᠢᠨ ᠢᠳ᠋ᠡᠭᠡᠨ  ᠤ ᠨᠢᠬᠡ ᠵᠦᠢᠯ ᠪᠣᠯᠣᠨ᠎ᠠ᠃          ᠰᠦ ᠳᠠᠢ ᠴᠠᠢ ᠄  ᠰᠦ ᠳᠠᠢ ᠴᠠᠢ︵ᠬᠡᠰᠢᠭᠳ᠋ᠡᠨ ᠬᠣᠰᠢᠭᠣᠨ ᠳ᠋ᠤ ᠠᠪᠠᠭ᠎ᠠ ᠴᠠᠢ ᠬᠡᠳ᠋ᠡᠭ ︶ᠪᠣᠯ ᠮᠣᠩᠭᠣᠯᠴᠣᠳ  ᠦᠨ ᠡᠳᠦᠷ ᠲᠣᠳᠤᠮ ᠤᠨ ᠠᠮᠢᠳᠤᠷᠠᠯ ᠳᠤ ᠲᠤᠲᠠᠭᠳᠠᠵᠤ ᠪᠣᠯᠤᠰᠢ ᠦᠭᠡᠢ ᠳᠡᠭᠡᠳᠦ ᠤᠮᠳᠠᠭᠠᠨ ᠪᠣᠯᠣᠨ᠎ᠠ᠃ ᠬᠡᠰᠢᠭᠳ᠋ᠡᠨ ᠬᠣᠰᠢᠭᠣᠨ  ᠤ ᠠᠪᠠᠭ᠎ᠠ ᠴᠠᠢ ᠬᠢᠳ᠋ᠡᠭ ᠠᠷᠭ᠎ᠠ ᠨᠢ ᠄   ᠬᠥᠬᠡ ᠴᠠᠢ ᠪᠠᠨ ᠴᠢᠨᠠᠵᠣ ᠪᠠᠭᠤᠯᠭᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠶᠡᠭᠦᠯᠡᠵᠦ ᠲᠤᠩᠭᠠᠭᠠᠳ᠂︵ᠤᠳ᠋ᠣ ᠪᠣᠯ ᠤᠯᠠᠩᠬᠢ ᠳ᠋ᠤ ᠪᠠᠨ ᠬᠡᠪ  ᠦᠨ ᠴᠠᠢ ᠪᠠᠨ ᠬᠡᠮᠬᠡᠯᠡᠭᠰᠡᠨ  ᠤ ᠳᠠᠷᠠᠭ᠎ᠠ ᠱᠠ ᠪᠦᠰ ᠤᠭᠣᠳ᠋ᠠᠨ ᠳ᠋ᠤ ᠬᠢᠵᠦ᠂ ᠠᠮᠣ ᠪᠣᠳ᠋ᠠᠭ᠎ᠠ᠂  ᠰᠦ ᠳᠠᠢ ᠪᠠᠨ ᠬᠠᠮᠳ᠋ᠣ ᠴᠣᠭ ᠴᠢᠨᠠᠳ᠋ᠠᠭ ᠪᠣᠯᠵᠠᠢ ︶ᠲᠣᠭᠤᠭ᠎ᠠ ᠪᠠᠨ ᠤᠬᠢᠶᠠᠵᠤ ᠴᠡᠪᠡᠷᠯᠡᠨ ᠰᠢᠷ᠎ᠠ ᠳᠣᠰᠣᠨ ᠳ᠋ᠤ ᠬᠠᠭᠣᠷᠣᠭᠰᠠᠨ ᠨᠠᠷᠢᠮᠣ ᠪᠣᠳ᠋ᠠᠭ᠎ᠠ  ᠶᠢ ᠲᠤᠩᠭᠠᠭᠰᠠᠨ ᠴᠠᠢ ᠪᠡᠷ ᠴᠢᠨᠠᠵᠤ᠂ ᠣᠷᠭᠢᠯᠲᠠᠯ᠎ᠠ ᠪᠣᠴᠠᠯᠭᠠᠭᠰᠠᠨ  ᠤ ᠳᠠᠷᠠᠭ᠎ᠠ ᠲᠦᠭᠦᠬᠡᠢ ᠰᠦ︵ᠪᠣᠶᠣ ᠰᠦᠨ ᠲᠠᠯᠬ᠎ᠠ ︶ᠪᠣᠯᠣᠨ ᠳᠠᠪᠣᠰᠣ ᠬᠢᠵᠦ ᠵᠦᠭᠡᠯᠡᠨ ᠭᠠᠯ  ᠢᠢᠠᠷ ᠴᠢᠨᠠᠨ᠎ᠠ᠃ ᠴᠢᠨᠠᠬᠤ ᠶᠢᠨ ᠳᠠᠭᠣ ᠰᠢᠨᠠᠭ᠎ᠠ ᠪᠠᠷ ᠳᠠᠰᠣᠷᠠᠯ ᠦᠭᠡᠢ ᠰᠠᠮᠤᠷᠴᠤ᠂ ᠠᠩᠬᠢᠯᠦᠮ᠎ᠠ ᠰᠠᠶᠢᠬᠠᠨ ᠴᠠᠢ ᠶᠢᠨ ᠥᠨᠥᠷ ᠬᠠᠩᠬᠤᠯᠬᠤ ᠦᠶ᠎ᠡ ᠳᠦ ᠲᠠᠷᠤᠢ ᠤᠤᠭᠤᠳᠠᠭ᠃ ᠤᠯᠠᠭᠠᠨᠬᠠᠳ᠋ᠠ  ᠢᠢᠨ ᠪᠣᠰᠣᠳ ᠭᠠᠵᠠᠷ ᠤᠨ ᠬᠢᠨ  ᠰᠦ ᠳᠠᠢ ᠴᠠᠢ ᠴᠢᠨᠠᠬᠣ ᠳ᠋ᠤ ᠪᠠᠨ ᠨᠠᠷᠢᠮᠣ ᠪᠣᠳ᠋ᠠᠭ᠎ᠠ ᠬᠢᠳ᠋ᠡᠭ ᠦᠭᠡᠢ ᠶᠣᠮ᠃        ᠤᠯᠠᠮᠵᠢᠯᠠᠯᠳᠤ ᠬᠣᠭᠣᠯᠠ ᠢᠳᠡᠭᠡᠨ  ᠬᠠᠭᠣᠷᠣᠭᠰᠠᠨ ᠪᠣᠳ᠋ᠠᠭ᠎ᠠ ᠄ ᠮᠤᠩᠭᠤᠯᠴᠤᠳ  ᠤᠨ ᠠᠮᠢᠳ᠋ᠣᠷᠠᠯ ᠳ᠋ᠤ ᠳᠣᠳ᠋ᠠᠭᠳ᠋ᠠᠵᠣ ᠪᠣᠯᠣᠰᠢ ᠦᠭᠡᠢ ᠤᠯᠠᠮᠵᠢᠯᠠᠯᠳᠤ ᠭᠣᠣᠯ ᠢᠳ᠋ᠡᠭᠡᠨ  ᠤ ᠨᠢᠭᠡ ᠪᠣᠯᠣᠨ᠎ᠠ᠃ ᠬᠠᠭᠣᠷᠣᠭᠰᠠᠨ ᠪᠣᠳ᠋ᠠᠭ᠎ᠠ ᠶᠢ ᠮᠤᠩᠭᠤᠯ ᠠᠮᠤ ᠪᠠᠷ ᠬᠠᠭᠤᠷᠴᠤ ᠬᠢᠳᠡᠭ᠃ ᠪᠤᠳᠠᠭ᠎ᠠ ᠬᠠᠭᠤᠷᠬᠤ ᠠᠯᠬᠣᠮ ᠳᠠᠷᠠᠭ᠎ᠠ ᠪᠣᠯ᠂ ᠤᠷᠢᠳ᠋ᠠᠪᠠᠷ ᠮᠣᠩᠭᠣᠯ ᠠᠮᠣ ᠪᠠᠨ ᠳᠡᠪᠢᠨ ᠴᠡᠪᠡᠷᠯᠡᠵᠤ ᠲᠡᠮᠦᠷ ᠲᠣᠭᠤᠭᠠᠨ ᠳᠤ ᠬᠢᠵᠦ ᠲᠡᠭᠡᠷ᠎ᠡ ᠨᠢ ᠵᠤᠬᠢᠬᠤ ᠬᠡᠮᠵᠢᠶᠡᠨ ᠦ ᠤᠰᠤ ᠬᠢᠵᠤ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠬᠥᠭᠡᠵᠦ︵ᠴᠢᠨᠠᠬᠤ︶ ᠬᠥᠭᠡᠬᠦ ᠶᠠᠪᠤᠴᠠ ᠳᠤ ᠪᠠᠶᠢᠳᠠᠯ ᠢ ᠨᠢ ᠦᠵᠡᠵᠤ ᠠᠮᠤ ᠪᠠᠨ ᠲᠠᠰᠤᠷᠠᠯ ᠦᠭᠡᠢ ᠤᠷᠪᠠᠭᠤᠯᠤᠨ ᠬᠦᠭᠡᠭᠡᠯᠭᠡᠨ᠎ᠡ᠃ ᠠᠮᠤ ᠬᠦᠭᠡᠭᠡᠭᠰᠡᠨ ᠦ ᠲᠠᠷᠠᠭ᠎ᠠ ᠲᠣᠭᠣᠭᠠᠨ ᠠᠴᠠ ᠠᠭᠤᠳᠠᠯᠠᠨ ᠭᠠᠷᠭᠠᠵᠤ ᠪᠠᠭ᠎ᠠ ᠬᠠᠲᠠᠭᠠᠭᠠᠳ ᠲᠡᠮᠦᠷ ᠲᠣᠭᠣᠭᠠᠨ ᠳᠤ ᠪᠣᠯᠳᠠᠯ᠎ᠠ ᠬᠠᠭᠤᠷᠴᠤ ᠢᠩᠳᠡᠨ ᠴᠠᠶᠢᠯᠭᠠᠵᠤ ᠢᠳᠡᠳᠡᠭ᠃ ᠬᠡᠷᠪᠡ ᠬᠡᠤᠷᠡᠭ ᠪᠣᠳᠠᠭ᠎ᠠ ᠬᠠᠭᠤᠷᠬᠤ ᠭᠡᠪᠡᠯ ᠠᠮᠤ  ᠶᠢ ᠬᠦᠢᠴᠡᠳ ᠬᠥᠭᠡᠭᠡᠯᠭᠡᠭᠭᠰᠡᠨ ᠤ ᠳᠠᠷᠠᠭ᠎ᠠ ᠠᠭᠣᠳ᠋ᠠᠯᠣᠨ ᠭᠠᠷᠭᠠᠵᠣ᠂ ᠲᠣᠭᠣᠭᠠᠨ  ᠳᠦ ᠪᠡᠨ ᠴᠡᠪᠡᠷ ᠴᠠᠭᠠᠨ ᠰᠢᠷᠤᠶ ᠬᠢᠵᠤ ᠤᠯᠠᠶᠢᠳᠠᠯ᠎ᠠ ᠬᠠᠯᠠᠭᠤᠯᠵᠤ  ᠬᠥᠭᠡᠯᠭᠡᠭᠰᠡᠨ ᠠᠮᠤ ᠪᠠᠨ ᠬᠤᠳᠬᠤᠭᠤᠷ ᠢᠶᠠᠷ ᠰᠢᠷᠦᠭᠦᠨ ᠭᠠᠯ ᠳᠡᠭᠡᠷ᠎ᠡ ᠲᠦᠷᠭᠡᠨ ᠬᠤᠳᠬᠤᠵᠤ ᠠᠮᠤ ᠪᠠᠨ ᠬᠤᠸᠠᠷ ᠭᠠᠷᠲᠠᠯ᠎ᠠ ᠬᠠᠭᠤᠷᠴᠤ ᠲᠦᠷᠭᠡᠨ ᠭᠠᠷᠭᠠᠵᠤ ᠠᠪᠤᠨ᠎ᠠ᠃ ᠲᠡᠭᠡᠭᠡᠳ ᠢᠩᠳᠡᠨ ᠴᠠᠶᠢᠯᠭᠠᠵᠤ ᠢᠳᠡᠳᠡᠭ᠃        ᠠᠮᠣᠰᠣ︵ᠰᠢᠷ᠎ᠠ ᠲᠣᠰᠤ ᠲᠠᠢ ᠠᠭᠰᠢᠭᠣᠨ ᠪᠣᠳ᠋ᠠᠭ᠎ᠠ︶᠄ ᠠᠮᠣᠰᠣ ᠪᠣᠯ ᠦᠨᠦᠷ ᠠᠮᠳ᠋ᠠ ᠨᠢ ᠰᠠᠶᠢᠬᠠᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠳᠠᠢ ᠤᠯᠠᠮᠵᠢᠯᠠᠯᠳ᠋ᠣ ᠢᠳ᠋ᠡᠭᠡᠨ ᠪᠣᠯᠣᠨ᠎ᠠ᠃ ᠬᠤᠶᠢᠳᠤ ᠬᠡᠰᠡᠭ  ᠦᠨ ᠵᠠᠷᠢᠮ ᠬᠣᠰᠢᠭᠣ ᠰᠢᠶᠠᠨ  ᠤ ᠮᠠᠯᠵᠢᠬᠤ ᠤᠷᠤᠨ ᠤ ᠮᠤᠩᠭᠤᠯᠴᠤᠳ ᠤᠳ᠋ᠣ ᠪᠣᠯᠳ᠋ᠠᠯ᠎ᠠ ᠠᠮᠤᠰᠤ ᠬᠢᠵᠤ ᠢᠳᠡᠳᠡᠭ᠃ ᠤᠯᠠᠩᠬᠢ  ᠳᠦ ᠪᠡᠨ ᠳᠠᠬᠢᠯᠭ᠎ᠠ ᠲᠠᠬᠢᠬᠤ ᠪᠣᠶᠣ ᠬᠦᠨᠳ᠋ᠦᠳ᠋ᠦ ᠬᠡᠶᠢᠴᠢᠨ ᠢᠢᠠᠨ ᠳᠠᠶᠢᠯᠠᠬᠤ ᠦᠶ᠎ᠠ ᠳ᠋ᠤ ᠬᠢᠳᠡᠭ᠂ ᠠᠮᠣᠰᠣ ᠪᠠᠨ ᠮᠣᠳ᠋ᠣᠨ ᠳᠠᠪᠠᠭ ᠪᠣᠶᠣ ᠮᠦᠩᠭᠦᠨ ᠳᠠᠪᠠᠭ ᠲᠦ ᠳᠦᠭᠦᠷᠲᠡᠯ᠎ᠡ ᠬᠢᠵᠦ᠂ ᠰᠢᠨᠠᠭ᠎ᠠ ᠪᠠᠷ ᠰᠣᠪᠣᠷᠭ᠎ᠠ ᠬᠡᠯᠪᠡᠷᠢ ᠳᠠᠢ ᠪᠣᠯᠭᠠᠨ ᠲᠦᠷᠪᠡᠨ ᠳᠠᠯ᠎ᠠ ᠳ᠋ᠤ ᠨᠢ ᠴᠢᠪᠠᠭ᠎ᠠ ᠰᠢᠭᠡᠳᠬᠡᠵᠦ᠂ ᠤᠷᠣᠢ ᠲᠡᠭᠡᠷ᠎ᠡ ᠨᠢ ᠬᠣᠩᠬᠣᠶᠢᠯᠭᠠᠨ ᠰᠢᠷ᠎ᠠ ᠳᠣᠰᠣ ᠬᠢᠵᠦ ᠰᠠᠬᠢᠭᠤᠯᠰᠤᠨ ᠢᠶᠠᠨ ᠲᠠᠬᠢᠬᠤ ᠪᠤᠶᠤ ᠬᠦᠨᠳᠦᠲᠦ ᠭᠡᠶᠢᠴᠢᠨ  ᠳᠤ ᠪᠠᠨ ᠡᠷᠭᠦᠨ ᠪᠠᠷᠢᠳᠠᠭ᠃ ᠠᠮᠣᠰᠣ ᠢᠳ᠋ᠡᠬᠦ  ᠳᠤ ᠤᠨᠴᠠᠭᠠᠢ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃ ᠲᠠᠷᠤᠢ ᠭᠡᠶᠢᠴᠢᠨ ᠠᠮᠣᠰᠣ  ᠢᠢ ᠳᠣᠰᠴᠣ ᠠᠪᠣᠭᠰᠠᠨ  ᠤ ᠬᠤᠶᠢᠨ᠎ᠠ᠂ ᠤᠷᠢᠳᠠᠪᠠᠷ ᠬᠠᠯᠪᠠᠭ᠎ᠠ ᠪᠠᠷ ᠤᠷᠣᠢ ᠲᠡᠭᠡᠷ᠎ᠡ ᠡᠴᠠ ᠨᠢ ᠪᠠᠭᠤᠯᠭᠠᠨ ᠠᠪᠴᠤ᠂ ᠭᠠᠯ  ᠤᠨ ᠲᠠᠬᠢᠯᠭ᠎ᠠ ᠶᠢᠨ ᠢᠷᠤᠭᠡᠯ ᠤᠩᠰᠢᠵᠤ ᠭᠠᠯ ᠳᠤ ᠡᠷᠭᠦᠭᠰᠡᠨ ᠦ ᠳᠠᠷᠠᠭ᠎ᠠ ᠰᠠᠶ᠋ᠢ ᠳᠣᠮᠳ᠋ᠠ ᠡᠴᠠ ᠨᠢ ᠲᠣᠭᠤᠷᠢᠭᠤᠯᠤᠨ ᠬᠠᠮᠤᠵᠤ ᠢᠳᠡᠨ᠎ᠡ᠃ ᠠᠮᠣᠰᠣ ᠬᠢᠬᠦ ᠠᠷᠭ᠎ᠠ᠄ ᠵᠦᠭᠡᠭᠡᠢ ᠪᠠᠨ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ ᠪᠣᠴᠠᠯᠭᠠᠭᠠᠳ᠂ ᠵᠣᠬᠢᠬᠣ ᠬᠡᠮᠵᠢᠶᠡᠨ  ᠤ ᠠᠶᠢᠷᠠᠭ᠂ ᠪᠤᠷᠠᠮ ᠪᠣᠶᠤ ᠴᠠᠭᠠᠨ ᠰᠢᠬᠢᠷ᠂ ᠲᠠᠪᠤᠰᠤ᠂ ᠪᠣᠳ᠋ᠠᠭ᠎ᠠ︵ᠬᠠᠳ᠋ᠠᠭᠣ ᠬᠠᠭᠣᠷᠠᠭᠰᠠᠨ ᠪᠣᠳ᠋ᠠᠭ᠎ᠠ᠂ ᠨᠠᠷᠢᠮᠣ᠂ ᠳᠣᠳ᠋ᠣᠷᠭ᠎ᠠ ᠪᠦᠷ ᠪᠣᠯᠣᠨ᠎ᠠ ︶ᠬᠢᠵᠦ᠂ ᠵᠦᠭᠡᠯᠡᠨ ᠭᠠᠯ  ᠢᠢᠠᠷ ᠴᠢᠨᠠᠵᠤ ᠪᠣᠯᠭᠣᠭᠰᠠᠨ  ᠤ ᠳᠠᠷᠠᠭ᠎ᠠ ᠰᠢᠷ᠎ᠠ ᠳᠣᠰᠣ᠂ ᠬᠠᠳ᠋ᠠᠭᠠᠭᠰᠠᠨ ᠦᠵᠦᠮ᠂ ᠬᠥᠬᠡ ᠭᠦᠢᠯᠡᠰᠦ ᠶᠢᠨ ᠬᠡᠷᠴᠢᠮᠡᠯ ᠵᠡᠷᠭᠡ  ᠢᠢ ᠬᠢᠵᠦ ᠰᠢᠨᠠᠭ᠎ᠠ ᠪᠠᠷ ᠨᠤᠬᠤᠯᠠᠵᠤ ᠠᠭᠰᠢᠭᠠᠪᠠᠯ ᠪᠣᠯᠴᠢᠬᠠᠨ᠎ᠠ᠃         ᠲᠣᠬᠣᠯᠠᠢ ︵ᠲᠤᠭᠤᠯ ᠲᠠᠩ︶᠄ ᠶᠡᠷᠤᠳᠡᠭᠡᠨ ᠴᠠᠭᠠᠨ ᠭᠣᠯᠢᠷ᠂ ᠰᠠᠭᠠᠭ  ᠦᠨ ᠭᠣᠯᠢᠷ ᠪᠣᠶᠣ ᠶᠣᠣᠮᠠᠢ  ᠢᠢᠨ ᠭᠣᠯᠢᠷ  ᠢᠢᠠᠷ ᠬᠢᠳ᠋ᠡᠭ᠃ ᠡᠭᠦᠨ ᠢ ᠬᠢᠬᠦ  ᠳᠤ ᠪᠠᠨ ᠭᠣᠯᠢᠷ  ᠢᠢᠠᠨ ᠨᠤᠬᠤᠭᠰᠠᠨ ᠤ ᠲᠠᠷᠠᠭ᠎ᠠ ᠨᠢᠮᠬᠡᠯᠡᠨ ᠲᠦᠷᠪᠡᠯᠵᠢᠨ ᠪᠣᠶᠤ ᠬᠤᠰᠢᠭᠤᠯᠵᠢᠨ ᠬᠡᠷᠴᠢᠵᠦ᠂ ᠲᠠᠪᠤᠰᠤ ᠲᠠᠢ ᠤᠰᠤᠨ ᠳᠤ ᠴᠢᠨᠠᠵᠤ ᠪᠣᠯᠭᠤᠭᠠᠳ᠂ ᠱᠦᠭᠦᠵᠦ ᠭᠠᠷᠭᠠᠨ᠂ ᠲᠠᠬᠢᠨ ᠵᠦᠭᠡᠭᠡᠢ ᠳᠠᠢ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ᠂ ᠪᠣᠴᠠᠯᠭᠠᠭᠠᠳ ᠢᠳᠡᠨ᠎ᠡ᠃ ᠶᠡᠷᠦ ᠨᠢ ᠵᠣᠨ  ᠤ ᠴᠠᠭ ᠤᠨ ᠤᠷᠣᠢ  ᠶᠢᠨ ᠬᠣᠭᠣᠯᠠ ᠪᠣᠶᠣ ᠬᠡᠶᠢᠴᠢᠨ ᠳᠠᠶᠢᠯᠠᠬᠣ ᠳ᠋ᠤ ᠢᠳ᠋ᠡᠬᠦᠯᠬᠦ ᠳᠣᠬᠢᠷᠠᠮᠵᠢᠳ᠋ᠠᠢ ᠰᠠᠶᠢᠬᠠᠨ ᠢᠳ᠋ᠡᠬᠡᠨ ᠪᠣᠯᠣᠨ᠎ᠠ᠃         ᠮᠢᠬ᠎ᠠ ᠳᠠᠢ ᠰᠢᠩᠭᠡᠨ ᠪᠣᠳ᠋ᠠᠭ᠎ᠠ ᠄ ᠡᠭᠦᠨ ᠢ ᠬᠢᠬᠦ ᠠᠷᠭ᠎ᠠ ᠨᠢ ᠬᠡᠰᠡᠭᠯᠡᠨ ᠬᠡᠷᠴᠢᠭᠰᠡᠨ ᠦᠭᠡᠷ  ᠦᠨ ᠮᠢᠬ᠎ᠠ ᠪᠣᠶᠣ ᠬᠣᠨᠢᠨ ᠮᠢᠬ᠎ᠠ ᠪᠠᠨ ᠳᠣᠭᠣᠭᠠᠨ ᠳ᠋ᠤ ᠬᠢᠵᠦ ᠰᠢᠷᠦᠭᠦᠨ ᠭᠠᠯ  ᠢᠢᠠᠷ ᠴᠢᠨᠠᠵᠤ  ᠪᠣᠷᠣᠯᠠᠭᠤᠯᠤᠭᠰᠠᠨ  ᠤ ᠲᠠᠷᠠᠭ᠎ᠠ ᠪᠣᠳ᠋ᠠᠭ᠎ᠠ ᠬᠢᠵᠦ᠂ ᠮᠢᠬ᠎ᠠ ᠶᠢ ᠨᠢ ᠪᠣᠯᠭᠣᠵᠤ ᠪᠣᠳ᠋ᠠᠭ᠎ᠠ ᠨᠢ ᠰᠢᠯᠵᠠᠷᠠᠬᠤ ᠦᠶ᠎ᠠ ᠳ᠋ᠤ᠂ ᠴᠢᠪᠠᠭ᠎ᠠ ᠪᠤᠯᠤᠨ ᠪᠤᠷᠠᠮ ᠨᠠᠮᠠᠵᠤ ᠰᠢᠩᠭᠡᠨ ᠬᠣᠭᠤᠯᠨ ᠪᠣᠯᠭᠠᠨ ᠴᠢᠨᠠᠵᠤ ᠢᠳᠡᠨ᠎ᠡ᠃ ᠳᠣᠰ ᠬᠣᠭᠣᠯᠠ ᠨᠢ ᠬᠠᠯᠠᠭᠣᠨ ᠴᠢᠨᠠᠷ ᠳᠠᠢ᠂ ᠰᠢᠮ᠎ᠠ ᠳᠡᠵᠢᠭᠡᠯ ᠡᠯᠪᠡᠭ᠂ ᠣᠯᠠᠩᠬᠢ  ᠳᠦ ᠪᠡᠨ ᠬᠦᠮᠦᠰ ᠭᠣᠷᠪᠠ ᠶᠢᠰᠦ ᠶᠢᠨ ᠬᠦᠢᠳ᠋ᠡᠨ ᠳ᠋ᠤ ᠢᠳ᠋ᠡᠳ᠋ᠡᠭ᠃         ᠳᠡᠭᠡᠷᠡᠬᠢ ᠪᠣᠯ ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠦ ᠤᠯᠠᠮᠵᠢᠯᠠᠯᠳ᠋ᠣ ᠬᠣᠭᠣᠯᠠ ᠢᠳ᠋ᠡᠭᠡᠨ ᠪᠣᠯᠣᠨ᠎ᠠ᠃ ᠤᠳᠤᠬᠠᠨ ᠳᠤ ᠬᠢᠳ᠋ᠠᠳ ᠦᠨᠳ᠋ᠦᠰᠦᠳ᠋ᠡᠨ  ᠤ ᠪᠠᠩᠰᠢ᠂ ᠮᠢᠨᠳᠤᠤᠷ᠂  ᠬᠠᠭᠠᠷᠢᠭᠰᠠᠨ ᠪᠣᠣᠪᠣ᠂ ᠳᠣᠳ᠋ᠣᠷᠭ᠎ᠠ ᠵᠡᠷᠬᠡ ᠭᠣᠣᠯ ᠢᠳ᠋ᠡᠬᠡᠨ ᠨᠢ ᠮᠠᠯᠵᠢᠬᠣ ᠤᠷᠣᠨ ᠳ᠋ᠤ ᠤᠯᠠᠮᠵᠢᠯᠠᠭᠳᠠᠨ ᠤᠷᠤᠭᠰᠠᠨ ᠪᠠ ᠰᠠᠭᠤᠷᠢᠰᠢᠯ ᠮᠣᠩᠭᠣᠯᠴᠣᠳ ᠶᠡᠷᠦ ᠡᠴᠡ ᠡᠳ᠋ᠦᠷ  ᠦᠨ ᠭᠣᠷᠪᠠᠨ ᠡᠷᠢᠨ ᠦ ᠬᠣᠭᠣᠯᠠ ᠢᠳᠡᠵᠦ᠂ ᠴᠠᠭᠠᠨ ᠢᠳ᠋ᠡᠬᠡᠨ ᠡᠴᠠ ᠪᠣᠰᠣᠳ ᠭᠣᠣᠯ ᠢᠳᠡᠭᠡᠨ ᠬᠣᠯᠢᠰᠢᠨ ᠢᠳ᠋ᠡᠭᠡᠨ ᠨᠢ ᠪᠦᠷ ᠬᠢᠳ᠋ᠠᠳ ᠦᠨᠳ᠋ᠦᠰᠦᠳ᠋ᠡᠨ ᠳᠠᠢ ᠳᠡᠮᠡᠢ ᠢᠯᠭᠠᠭ᠎ᠠ ᠦᠭᠡᠢ ᠪᠣᠯᠵᠠᠢ᠃
ᠢᠷᠡᠯᠲᠡ᠄ ᠤᠯᠠᠭᠠᠨᠬᠠᠳᠠ ᠬᠤᠲᠠ ᠶᠢᠨ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ ᠤ ᠠᠯᠪᠠᠨ ᠭᠡᠷ ᠤᠨ ᠣᠷᠴᠢᠭᠤᠯᠭ᠎ᠠ ᠶᠢᠨ ᠰᠠᠯᠠᠭ᠎ᠠ